Русија тврди дека убила 300 украински војници во нападот на училиште во Краматорск

Руското Министерство за одбрана тврди дека убило „до 300 националисти“ во напад на училишна зграда во Краматорск.

Во својот дневен брифинг, Министерството, без да обезбеди никакви докази, рече:

„Како резултат на удар со копнено прецизно оружје, уништено е привременото распоредување на националистичката формација ‘Црна стотка’, распоредена во зградата на училиштето бр. 23 во градот Краматорск. Елиминирани се до триста националисти и над 40 единици специјална опрема“.

Министерството, исто така, соопшти дека во периодот од 5 до 20 јули уништило четири фрлачи и едно транспортно возило за товарење на ракетниот систем Химарс, испорачан од САД. Исто така, тврди дека соборила 12 украински беспилотни летала.

Ниту едно од тврдењата на руското Министерство за одбрана не е независно потврдено.

Сликите од местото на вчерашниот напад на училиштето во Краматорск покажаа случајни минувачи како гледаат во остатоците додека се расчистуваа.

Украинските работници за итни случаи извлекоа три тела од училиштето, соопштија властите во петокот. Украинската државна агенција за итни случаи соопшти дека ја завршила работата во училиштето, пренесува Асошиетед прес.