Русија случајно бомбардираше сопствено село во близина на Украина

Русија соопшти дека во вторникот случајно бомбардирала село во нејзиниот јужен регион Воронеж во близина на Украина, пренесе агенцијата Франс прес.

Несреќата се случи истиот ден кога Русија ја погоди Украина со ракетен напад од големи размери.

Во соопштението цитирано од руските новински агенции, руската армија вели:

„На 2 јануари 2024 година, околу 9 часот по московско време, за време на летот на воздушните сили, се случи ненормално испуштање на авионска муниција над селото Петропавловка во регионот Воронеж.

Нема жртви“.

Министерството соопшти дека во несреќата биле оштетени шест приватни куќи, пренесоа руските новински агенции.

„Во тек е истрага за околностите на инцидентот. Комисија работи на терен за да ја процени природата на штетата и да обезбеди помош за обновување на куќите“, се вели во соопштението.

Гувернерот на регионот Воронеж, Александар Гусев, рече дека некои од жителите на Петропавловка, 150 километри источно од границата со Украина, се преместени во привремено сместување.

Тој, исто така, рече дека нема жртви, но призна дека има „евидентирано уништување во седум домаќинства“.