Русија се закани дека ќе ги потопи сите бродови што пловат кон Украина

Руската војска ќе ги смета за воени цели сите бродови кои се упатуваат кон пристаништата во Украина, а земјите под чие знаме одат ќе бидат учесници во војната на страната на Киев, соопшти во средата руското Министерство за одбрана.

Одлуката стапува на сила од 00:00 часот по московско време на 20 јули и е донесена „во врска со прекинот на Црноморската иницијатива и скратувањето на поморскиот хуманитарен коридор“, се вели во соопштението на Министерството.

„Сите бродови во водите на Црното Море кои се упатуваат кон пристаништата во Украина ќе се сметаат за потенцијални превозници на воен товар. …Земјите со знаме на таквите бродови ќе се сметаат за вклучени во украинскиот конфликт на страната на режимот во Киев“, предупредува Министерството за одбрана.

Русија на 17 јули објави дека се повлекува од „договорот за жито“, според кој на светските пазари се извезени 33 милиони тони храна. Руското Министерство за надворешни работи предупреди дека ги повлекува гаранциите за безбедна пловидба во Црното Море, а Кремљ, преку секретарот за печат на претседателот Дмитриј Песков, се закани со „воени ризици“ доколку житото се извезе без согласност на Москва.

Претседателот на Украина, Володимир Зеленски, како одговор му нареди на Министерството за надворешни работи да ги покани ОН и Турција да ја обноват работата на „житниот коридор“ без учество на Москва. Сепак, прашањето за безбедносните гаранции за превозниците на жито сѐ уште не е решено. Турција, еден од гарантите на договорот со Русија, не сака да ја поврзе својата флота со придружба на бродови кои извезуваат жито и смета дека таквиот потег е ризичен, изјави за Блумберг извор запознаен со ситуацијата. Соединетите Држави, исто така, одбија да извршат воена придружба на бродови кои заминуваат од украинските пристаништа.