Русија сака да ја „денацифизира“ и Германија

Кремљ во понеделникот соопшти дека снимката за која се тврди дека содржи германски воени разговори покажува дека вооружените сили на Германија разговараат за плановите за напад на руска територија и се прашува дали канцеларот Олаф Шолц ја контролира ситуацијата.

Минатата недела, Маргарита Симонјан, шефот на државните пропагандни канали РТ, објави речиси 40-минутна снимка во која тврди дека на онлајн состанок на највисоките германски воени функционери се разговарало за оружје за Украина и за потенцијален удар од Киев врз мостот (најверојатно Кримскиот). Таа не кажа како го добила записот, само рече дека ѝ ја дале „другари со еполети“.

Германскиот амбасадор во Москва денеска е повикан на објаснувања во МНР.

Марија Захарова, портпаролката на министерството, денеска во оваа прилика, цитирана од РИА „Новости“, изјави дека „денацификацијата на Германија не е целосна и доколку Германците не ја променат ситуацијата, последиците за федералната република ќе бидат страшни“..

Пред тоа, таа напиша дека во Германија нема демократија, „елитата, моќта и луѓето немаат одговорност еден кон друг, немаат повратни информации“, сите информации се искривени и нивното поднесување е насочено, Германија е управувана од „невидлива и непозната за избирачкиот систем во државниот апарат“.

Германија вели дека ја истражува снимката, вклучително и од воен контраразузнавачки тим. Но, неофицијално, се вели дека снимката се чини дека е автентична – иако не е сигурно дека делови од неа не се манипулирани, а транскриптот циркулиран на социјалните мрежи е оспорен – и дека војската била невешт во нејзината комуникација бидејќи ја користла и апликацијата WebEx, која не е доволно безбедна.

„Самата снимка вели дека во рамките на Бундесверот суштински и конкретно се разговара за плановите за удар на руска територија. За тоа не е потребно никакво правно толкување. Сè овде е повеќе од очигледно“, изјави портпаролот на Кремљ, Дмитриј Песков.

„Треба да откриеме дали Бундесверот го прави ова самоиницијативно. Тогаш прашањето е колку Бундесверот е контролиран и колку Шолц ја контролира ситуацијата? Или ова е дел од политиката на германската влада“, праша Песков. „И двете (сценарија) се многу лоши. И двете уште еднаш го истакнуваат директното вклучување на земјите од колективниот Запад во конфликтот околу Украина“.

Во разговорот се споменуваат германски ракети, но не се прецизира кои. Веројатно зборуваат за „Таурус“, кој Шолц се воздржува да им ги испрати на Украинците поради загриженоста дека имаат дострел од околу 500 километри, со напредна радио-електронска заштита и „можат да завршат некаде во Москва“.

Засега канцеларот го нарече нејзиното објавување „многу сериозна работа“ која „во моментов се разјаснува многу внимателно, интензивно и брзо“. Денеска тој уште еднаш ја отфрли можноста за вооружување на Украина со „Таурус“ доколку мора за тоа мора да биде испратен и германски воен персонал на терен за користење на овој систем. „Не можете да испорачате оружен систем со многу долг дострел и да не размислувате за контрола над него“.

Министерот за одбрана Борис Писториус го опиша она што се случува како „хибриден дезинформациски напад – се работи за поткопување на нашето единство“.

Портпаролот на Министерството за одбрана потврди за агенцијата Франс прес дека министерството верува дека разговорот бил „фатен“. Ројтерс соопшти дека го слушал целиот 38-минутен разговор, но не може независно да ја потврди неговата автентичност.

Родерих Кизеветер од конзервативната германска опозиција коментира за весникот „Ханделсблат“ дека наскоро може да се појават повеќе снимки и дека тој лично смета дека снимката е автентична. „Се разбира, Русија покажа колку интензивно користи шпионажа и саботажа како дел од нејзината хибридна војна. Може да се очекува многу повеќе пресретнувања и протекувања да влијаат на донесувањето одлуки, да ги дискредитираат и манипулираат луѓето“.