Русија го гори гасот кој би се извезувал во Германија, додека цените вртоглаво растат

Додека енергетските трошоци во Европа растат со ракетна брзина, Русија согорува големи количини природен гас, според анализата споделена со Би-Би-Си.

Експертите велат дека гасот претходно би се извезувал во Германија.

Тие велат дека централата, во близина на границата со Финска, секојдневно согорува гас во вредност од околу 10 милиони долари.

Научниците се загрижени за големите количини на јаглерод диоксид и саѓи што ги создава, што може да го влоши топењето на мразот на Арктикот.

Анализата на „Ристад енерџи“ покажува дека од пламенот секојдневно согоруваат околу 4,34 милиони кубни метри гас.

Тој доаѓа од нова фабрика за течен природен гас (ЛНГ) во Портоваја, северозападно од Санкт Петербург.

Првите знаци дека нешто не е во ред дојдоа од финските граѓани крај блиската граница кои забележаа голем пламен на хоризонтот претходно ова лето.

Портоваја се наоѓа во близина на компресорска станица на почетокот на гасоводот „Северен тек 1“ кој носи гас под морето до Германија.

Испораките преку гасоводот се намалени од средината на јули, при што Русите ги обвинуваат техничките проблеми за ограничувањето. Германија вели дека тоа бил чисто политички потег по руската инвазија на Украина.

Би-Би-Си пишува дека од јуни истражувачите забележале значително зголемување на топлината што произлегува од објектот – и се смета дека е од палење на гас, согорување на природен гас.

Иако согорувањето на гас е вообичаено во погоните за преработка – обично се прави од технички или безбедносни причини – обемот на ова согорување ги збуни експертите.

„Никогаш не сум видела фабрика за ЛНГ да пламнува толку многу“, вели д-р Џесика Мекарти, експерт за сателитски податоци од Универзитетот Мајами во Охајо. „Почнувајќи околу јуни, го видовме овој огромен врв и едноставно не исчезна“.

Марк Дејвис е извршен директор на Capterio, компанија која е вклучена во изнаоѓање решенија за палење на гас.

Тој вели дека палењето не е случајно и поверојатно е намерна одлука донесена од оперативни причини.

„Операторите честопати многу се двоумат дали всушност да ги затворат објектите од страв дека може да биде технички тешко или скапо да се стартуваат повторно, а веројатно е случај и овде“, изјави тој за Би-Би-Си.

Други веруваат дека може да има технички предизвици во справувањето со големите количини на гас кои го снабдуваа гасоводот „Северен тек 1“.

Руската енергетска компанија „Гаспром“ можеби имала намера да го користи тој гас за производство на ЛНГ во новата централа, но можеби имала проблеми со него и најбезбедната опција е да го изгори.

Тоа може да биде и резултат на трговското ембарго на Европа со Русија како одговор на инвазијата на Украина.

„Овој вид на долгорочно палење може да значи дека им недостасува одредена опрема“, вели Еса Вакилаинен, професор по енергетско инженерство од финскиот универзитет ЛУТ.

„Значи, поради трговското ембарго со Русија, тие не се во можност да ги направат висококвалитетните вентили потребни за процесуирањето на нафта и гас. Можеби некои од нив се расипани и не можат да ги заменат“.

„Гаспром“ – рускиот државен енергетски гигант кој е сопственик на централата – не одговори на барањата на Би-Би-Си за коментар за разгорувањето.

Финансиските и еколошките трошоци се зголемуваат секој ден кога пламенот продолжува да гори, велат научниците.

„Иако не се познати точните причини за палењето, волуменот, емисиите и локацијата на пламенот се видлив потсетник за доминацијата на Русија на европските енергетски пазари“, рече Синдре Кнутсон од „Ристад енерџи“.

„Не може да има појасен сигнал – Русија може да ги намали цените на енергијата уште утре. Ова е гас што инаку би се извезувал преку ‘Северен тек 1’ или алтернативи“.

Цените на енергијата ширум светот нагло пораснаа откако беа укинати заклучувањата за ковид и економиите се вратија во нормала. На многу места за работа, индустријата и забавата одеднаш им требаше повеќе енергија во исто време, правејќи невиден притисок врз добавувачите.

Цените повторно се зголемија во февруари годинава, по руската инвазија на Украина. Европските влади бараа начини да увезат помалку енергија од Русија, која претходно испорачуваше 40% од гасот што се користи во ЕУ.

Цените за алтернативните извори на гас се зголемија како резултат на тоа, а некои земји на ЕУ – како Германија и Шпанија – сега воведуваат мерки за заштеда на енергија.

Еколошките влијанија од горењето ги загрижуваат научниците.

Според истражувачите, палењето е многу подобро отколку едноставно испуштање на метанот кој е клучната состојка во гасот и е многу моќен агенс за затоплување на климата.

Русија има дебело досие во согорувањето на гасот – според Светска банка, таа е земја број еден кога станува збор за обемот на палење.

Но, покрај ослободувањето на околу 9.000 тони еквивалент на CO2 секој ден од овој пламен, согорувањето предизвикува други значајни проблеми. Црниот јаглерод е името дадено на честичките од саѓи кои се создаваат преку нецелосно согорување на горива како природен гас.

„Особена загриженост со палењето на арктичките географски широчини е транспортот на испуштениот црн јаглерод кон север, каде што се депонира на снегот и мразот и значително го забрзува топењето“, рече професор Метју Џонсон, од Универзитетот Карлтон во Канада.

„Некои високо цитирани проценки веќе го ставаат палењето како доминантен извор на таложење на црн јаглерод на Арктикот и секое зголемување на палењето во овој регион е особено непожелно“, вели тој за Би-Би-Си.