Румен Радев во Брисел го поддржал хомофобичниот закон на Орбан

Бугарскиот претседател на самитот повикал слободата, толеранцијата и човечкото достоинство да не се користат како клишеа

Бугарскиот претседател Румен Радев по завршувањето на Европскиот совет во Брисел го поддржа хомофобичниот закон на Виктор Орбан, поради кој имаше жестока дебата што траеше неколку часа, при што дури беше речено дека унгарскиот премиер треба да избере дали воопшто ќе остане во ЕУ со таквата политика.

„Осудата на Унгарија нема да го реши проблемот“, беше цитиран Румен Радев од прес-службата на претседателството. За време на дебатата – опишана од него како емотивна, но не и драматична – тој повикал европските вредности како што се слободата, толеранцијата и човечкото достоинство да не се користат како клишеа, но исто така и за нивна прецизна употреба.

„Правото на самоопределување е основна вредност и мора да се запази, но никој нема право да им го наметнува на другите своето разбирање и поглед на светот“, рече шефот на државата. „Затоа го повикав премиерот Орбан да ги сподели не само деталите за овој закон, туку и мотивите и причините за нивното донесување. Орбан јасно стави до знаење дека тие веруваат дека овој закон има за цел да ги заштити правата на детето и семејството“, рекол Румен Радев, се вели во соопштението.

Од неговата изјава произлегува дека шефот на бугарската држава нема идеја за каков закон станува збор и за што се однесува спорот.

Орбан, всушност, копираше руски закон против ширење информации за хомосексуалци кај адолесценти од 2013 година, но ги спакува и ги претстави како закон против педофилија. На овој начин, неговата партија Фидес ги изедначува различните сексуални ориентации со злосторства како што се сексуални напади врз деца.

Така, секој обид да им се објасни на децата дека меѓу нас има луѓе со различно разбирање за социјалната улога на полот, во Унгарија се води како пропаганда за педофилија.

Неодамнешните анкети на јавното мислење покажуваат дека 46 отсто од Унгарците поддржуваат истополови бракови. Тоа не ги спречи спикерот на парламентот и член на Фидес, Ласло Коверда да каже дека „нема морална разлика помеѓу истополовите парови кои сакаат да посвојуваат и да се омажат и педофилите. Ние мора да се бориме против овие западни идеи и да ги зачуваме христијанските вредности“. (Дневник.бг)