„Ние сме НАТО“: Грција ќе ни го чува воздушниот простор

Министерството за одбрана на Република Северна Македонија и Министерството за национална одбрана на Република Грција денеска во Атина потпишаа Технички аранжман за надзор на воздушниот простор.

Како што соопшти Министерството за одбрна, аранжманот кој го потпишаа началникот на Генералштабот, генералот Васко Ѓурчиновски и началникот на грчата одбрана, генералот Христос Кристодулу претставува официјализирање на мисијата „Ер-полисинг “(Air-policing), а ќе се реализира во координација со НАТО.

– Потпишаниот аранжман  произлегува од новиот Договор за соработка во одбраната, потпишан од страна на министрите за одбрана, Радмила Шекеринска и Евангелос Апостолакис, за време на посетата во април, годинава на високата владина делегација на Грција на нашата држава, се наведува во соопштението.

Инаку, во месец мај со два прелета во воздушниот простор на земјава од страна на воздухоплови Ф-16 на грчката Армија, беше извршен првиот пробен прелет за потребите на Мисијата на НАТО „Ер-полисинг“, со цел проверка на комуникациите и радарската покриеност на нашиот воздухопловен простор.

Мисијата „Ер-полисинг“ е ексклузивна придобивка која важи само за земјите членки на Алијансата и вклучува користење на системот за следење на воздушниот простор и управување со системот за команда и контрола на воздухопловните сили со соодветни сили и средства за противвоздушна одбрана, вклучувајќи и борбени авиони. Целта е заштита на интегритетот на воздушниот простор на НАТО земјите членки.

И последната земја членка на НАТО, Црна Гора, во текот на пристапувањето во НАТО потпиша технички договор за „Ер-полисинг“ со Грција и Италија, стои во соопштението.

„Ние сме веќе НАТО: денеска во Атина со Министерството за национална одбрана на Грција го потпишавме Техничкиот аранжман за надзор на нашиот воздушен простор. Заштитата на небото е ексклузивно право само на земјите членки на НАТО. Одбројуваме до полноправно членство!“, соопшти министерката за одбрана, Радмила Шекеринска.