Романец го пренесувал своето возење на Фејсбук и усмртил три лица

Три лица погинаа на истокот од Романија кога маж, кој во живо го пренесувал своето брзо возење со спортски автомобил, слетал од патот и влетал во еден двор, соопшти денеска телевизијата Антена 1.

Во несреќата смртно настрадаа бремена жена, нејзиното тригодишно дете и 79-годишна жена.

Уште едно лице кое било во дворот е повредено кога автомобилот вчера слетал од патот во населбата Вацарени, на 250 километри источно од Букурешт.

Возачот и сопатникот од автомобилот исто така се повредени. Возачот се обидел да побегне, но набрзо бил уапсен.

Осомничениот возач со камера во автомобилот го снимал своето пребрзо возење и во живо го пренесувал на Фејсбук.

Романската Влада најави итно донесување закон со кој драстично се зголемуваат казните за лицата кои се играат со мобилните телефони во текот на возењето.