Ретроспективна изложба на Јован Шумковски во Музејот на современата уметност


Во Музејот на современата уметност во Скопје, од утре, па сѐ до 28 февруари 2021 година, ќе биде поставена ретроспективна изложба на Јован Шумковски насловена „Вода/Ѕид“.

Како што информираат од музејот, ретроспективната изложба го прикажува делото на еден од најзначајните и највлијателни македонски уметници, чија што речиси четири децениска уметничка практика ја дефинира постојан истражувачки интерес и смела инвентивност во формирањето и изразувањето на неговата ликовна мисла и поглед на светот и времето што го живееме.

– Осмислена од самиот Шумковски, концепцијата на поставката, не е претставена како линеарна хронологија на тој развој, туку е повеќе еден вид наративна монтажа на повеќе, привидно хетерогени и комплексни тематски планови, но поврзани истовремено по линија на развој на формите или на содржините, велат во соопштението.

Шумковски е редовен професор е на ФЛУ од 2002 година. Зад себе има над дваесет самостојни изложби во земјава и во светот (Белград, Сараево, Софија, Љубљана, Стокхолм, Париз, Њујорк, Александрија и други). Во 1995 година беше претставник на Македонија на познатото биенале во Сао Паоло во Бразил, а во 2001 на Биеналето во Венеција.

Изложбата може да се погледне секој ден, освен понеделник, од 10 до 20 часот, а во недела до 13 часот. Куратор на поставката е Зоран Петровски, а проектот е поддржан од Министерството за култура на РСМ, информираат од музејот.