Разубавување на дворовите на градинките „Весело Штркче“ и „Јаготка“ и изградба на 12 градинки, најави Тренчевска
Грижата за децата е високо на агендата на Владата и на Министерството за труд и социјална политика и затоа нема да застанеме во намерата да отвораме што повеќе детски градинки, рече министерката Јованка Тренчевска, при посетата на градинката „Весело Штркче“ во прилепското село Кривогаштани.
Како што соопшти МТСП, Тренчевска посочи дека оваа година со блок дотации од Министерството за труд и социјална политика во висина од околу два милиони денари, ќе бидат реконструирани дворовите на објектите за згрижување на деца од предучилишна возраст „Весело Штркче“, и на „Јаготка“, во селото Обршани.
-Со реконструкцијата на дворовите на градинките ќе овозможиме правилен раст и развој на децата, бидејќи тие ќе си играат со нови реквизити на меки подлоги и песок. На еден од објектите ќе биде поставена и нова заштитна ограда. За посреќна детска игра просторот ќе биде разубавен со зимзелени дрвја и клупи, рече министерката Тренчевска.
На децата од градинката „Весело Штркче“, министерката им подели дидактички играчки и друг игровен материјал со кој децата ќе можат полесно да го реализираат воспитно – образовниот процес.
Таа укажа дека Владата и Министерството, во повеќе општини, особено во руралните средини работат на проширување на капацитетите за згрижување на децата во градинките.
-Се стремиме кон европскиот просек, каде опфатот на деца во градинките е до 90 проценти. Ние до 2024 година планираме 60 проценти од децата од предучилишна возраст да бидат сместени во градинки. Во изминатиов период изградивме 65 објекти, со што го зголемивме капацитетот за згрижување за 3 850 деца. Во текот на оваа година ќе ја завршиме изградбата на отпочнатите градинки за 1 900 дечиња. Со отворање на 12 нови градинки во Свети Николе, Ерџелија, Росоман, Битола, Арачиново, Липково, Гостивар, Тетово, Теарце, Могила, Дебар, Гевгелија и во Карпош, планираме да го зголемиме опфатот за уште 1 450 деца, рече министерката Тренчевска.
Со Програмата за изградба, опремување и одржување на објектите за детска заштита, во следните години, ќе бидат дополнително изградени нови градинки, наведуваат од МТСП.