Raufi: Të akuzuarit për Monstrën do të lirohen nga burgu

Avokati Naser Raufi parashikon epilog të rastit Monstra sikurse për rastin Sopoti. Pret që në pesë ose gjashtë seancat e para gjyqësore të ketë epilog i cili do të jetë tërheqje e tërësishme e akuzës.
Raufi gjatë emisionit VOX në televizionin Shenja tha se Prokuroria Speciale do të nxjerrë edhe autorët e vërtetë të rastit me ndihmën e dëshmitarit të koduar i cili ka folur gjatë procesit fillestar gjyqësor.

“Vetë identifikimi i këtij personi do ta zbardh rastin se mendoj që ky person më në fund do të bashkëpunojë me PSP-në dhe do ta tregojë të gjithë montimin…Por mendoj që deri tani nuk e din identitetin e këtij personi të koduar, mendoj që pritet ligji për dëshmitarin e koduar, ndryshimet e ligjit, dhe në atë stadium pasi të kalojë ky ligj mendoj se me vetë identitetin, pa marrë parasysh po flas hipotetikisht edhe të mos jetë ky ligj, PSP duhet ta dijë identitetin e këtij personi patjetër, por jo vetëm PSP por edhe trupi gjykues” Raufi si mundësi veprimi për PSP-në e shef bashkëpunimin edhe me trupin gjykues, i cili e ka të njohur identitetin e dëshmitarit të koduar.

Raufi thotë se doemos identitetin e këtij personi duhet ta dijë edhe Prokuroria Speciale pasi që ka gjasa që ai njeri të jetë figurë kompromituese ose pjesëtar i shërbimit sekret dhe ngjashëm, dhe pa u zbuluar profili i tij, nuk ka kuptim as hulumtimi i mëtejmë. Naser Raufi, avokat “Mendoj që ka të bëjë për një person të montuar nga ana e shërbimit sekret, bile mund të jetë edhe kriminel dhe me vetë identitetin që minimum duhet ta dijë trupi gjyqësor që e udhëheq rastin, do të ndihmojë që sa më shpejt të zbardhet ky rast, pavarësisht se a do ta dijë PSP, por PSP jam i bindur se edhe pa ndryshimin e ligjit për dëshmitarin e koduar do ta dijë identitetin e këtij personi”./Gazeta Express/