Раде Шербеџија наполни 73 години: Роденден на Бриони со семејството

Хрватска– Актерската легенда Раде Шербеџија го прослави 73.роденден на островот Бриони со семејството – сопругата, режисерката Ленка Удовички со коja е во брак 29 години и трите ќерки кои допатува од целиот свет: Нина од Белград, Вања од Бризбејн и Милица од Ливерпул.

Од претходниот брак со кореографката Иванка Церовац ги има ќерката Луција и синот Данило.

На Бриони, со нивниот театар „Улисес“ ја подготвуваат претставата „Кој се плаши од Вирџинија Вулф“. Всушност, секога година, традиционално налето подготвуваат претстави на овој морски рај на кој своевремено резиденција имаше и југословенскиот претседател Тито.

Шербеџија е со задоволство виден гостин и во Македонија, и како автор и со концертите како пејач. Култна е неговата песна „Не дај се Инес“ на Арсен Дедиќ. На музички план соработуваше и со браќата Тавитјан и со Влатко Стефановски.

Во 2014 година го доби и македонското државјанство, во мандатот на министерката за култура Елизабета Канческа-Милевска како национален интерес на Македонија во културата.

Во Скопје, му беа преведени две книги „По дождот“ и „До последен здив“, во издание на „Три“  , а во 2016 години , фестивалот „Браќа Манаки“ се отвори со филмот „Ослободување на Скопје“ во негова режија. Филмот беше македонско-хрватско-финска копродукција и  поддржан од Европскиот филмски фонд за копродукции „Еуроимаж“.

Книгата „По дождот“ е продолжение на неговото дело „До последен здив“ и претставува збирка на автобиографски записи за врски и соработките со филмските ѕвезди во Холивуд, за пријателите, повторното враќање во Хрватска и предизвиците со кои се соочува еден уметник.

Македонската јавност најмногу го познава Раде Шербеџија по главната улога во филмот „Пред дождот“ на Милчо Манчевски. Неговата актерска и режисерска кариера премостува две времиња, она во времето на некогашна Југославија, кога сними стотина филмови и играше во многу театарски претстави, и времето по распадот на Југославија, кога благодарение на успехот на филмот „Пред дождот“ направи светска кариера, играјќи во филмови на Стенли Кјубрик, Клинт Иствуд и многу други, а каде партнери му беа Ванеса Редгрејв, Шарлиз Терон, Том Круз, Глен Клоуз, Ралф Фајнс, Морган Фримен..

Зборувајќи во интервјуа и споменувајќи ја својата педагошка работа, Шербеџија истакнува дека системот на образование на идните актери треба да се промени, а на младите колеги им препорачува да побегнат. Додава дека идните актери би требало да студираат многу други работи – книжевност, психологија и што било што ќе ги направи побогати, поподготвени за да бидат интересни како личности пред камерата и луѓето.

Шербеџија често бил на удар на критичарите, а неретко од него се бараа и политички одговори. Тој вели дека и денес го вознемирува политиката. Смета дека задачата на уметникот отсекогаш била да ги коментира животот и реалноста.

„Опасно е и незаслужено кога ќе ти го препишат епитетот на предавник на народот, но секој уметник треба во себе да ја има таа жица за коментирање на времето и критики на своите сопствени мецени“, додава Шербеџија.

Што се однесува до сегашните обвинувања за сексуално вознемирување што кружат во Холивуд, тој вели дека е страшно и дека ја поддржува иницијативата за заштита на девојките во Холивуд.

„Холивуд е немилосрден затоа што секој што таму ќе одлучи да се занимава со глума го сонува својот говор на доделувањето на „Оскарите“. Го сонува речиси секоја вечер и тоа е таа проклета вистина во Америка. Па доколку не се успее во тоа, тоа е катастрофа и е всушност постојана војна“, вели славниот актер.