Путин лично го одобрил апсењето на американскиот новинар Гершкович

Рускиот претседател Владимир Путин лично го одобри апсењето на новинарот на „Волстрит џорнал“, Еван Гершкович, кој беше обвинет од руските власти за шпионажа, пишува Блумберг, повикувајќи се на извори запознаени со ситуацијата.

Според нив, иницијативата за апсење на американскиот новинар била од високи функционери во руските специјални служби. Одлуката на Путин да уапси странски дописник за прв пат по речиси 40 години го одразува растечкото влијание на тврдокорните позиции на Кремљ кои се залагаат за продлабочување на судирот со Вашингтон, велат изворите на агенцијата.

Прес секретарот на Путин, Дмитриј Песков, рече дека тоа не е одлука на претседателот, туку „привилегија на специјалните служби“. „Тие ја вршеа својата работа“, рече претставник на Кремљ кој на денот на неговото апсење рече дека Гершкович бил „фатен на дело“.

„Одлуката на Путин треба да биде повик за будење не само за САД, туку и за целиот Запад“, рече Алина Пољакова, претседател на Центарот за анализа на европската политика во Вашингтон. Според неа, Путин смета дека нема враќање на стабилни и сигурни односи со западните земји.

31-годишниот Гершкович, беше приведен во Екатеринбург на 30 март. Тој е обвинет за шпионажа (член 276 од Кривичниот законик на Руската Федерација). Според ФСБ, новинарот „по инструкции на американската страна“ собирал податоци за работата на рускиот воено-индустриски комплекс. Гершкович стана првиот странски новинар кој е уапсен во Русија од 1986 година.

Американскиот претседател Џо Бајден претходно побара ослободување на Гершкович, а за време на разговорот со семејството на новинарот истакна дека „владата прави сѐ што е во нејзина моќ да го врати дома што е можно побрзо“.

Стејт департментот објави дека тоа е незаконски притвор на новинар. Овој статус му овозможува на американскиот оддел за надворешна политика да преговара за ослободување на Гершкович, вклучително и преку размена.

Русија се залагаше за вклучување на Владислав Кљушин, кој беше прогласен за виновен за инсајдерска трговија и хакирање на серверите на Демократската партија за време на претседателските избори во САД во 2016 година, во претходните размени на затвореници.

Во 2022 година, Русија и САД двапати разменија затвореници. Во декември, ѕвездата на ВНБА, Бритни Гринер се врати во САД, а трговецот со оружје Виктор Бут се врати во Русија.