Путин ќе изгради империја од Владивосток до Лисабон, вели Дмитриј Медведев
Мора да се променат свеста и лажните митови кај Украинците, објаснува поранешниот претседател на Русија
Владимир Путин се обидува да изгради руска империја која ќе се протега „од Владивосток до Лисабон“, предупреди во вторникот неговиот верен соработник Дмитриј Медведев, кој е особено агресивен во претставувањето на руските позиции од почетокот на инвазијата на Украина.
Медведев, заменик-претседател на рускиот Совет за безбедност, како и поранешен претседател, во објава на Телеграм рече дека Путин ја започнал својата брутална инвазија на поранешната советска република за да донесе мир во Украина.
Обвинувајќи ги „нацистите, убијците и соработниците“ за поттикнување на „русофобија“ во Украина по распадот на Советскиот Сојуз во 1991 година, тој објави дека „специјалната воена операција“ на Путин – започната во февруари за „демилитаризација“ и „денацификација“ на земјата – „нема да се решава само на боиштата“.
„Најважната цел е да се промени крвавата и полна со лажни митови свест на дел од денешните Украинци“, рече Медведев.
„Целта е за мирот на идните генерации на самите Украинци и можноста конечно да се изгради отворена Евроазија – од Лисабон до Владивосток“, нагласува Медведев.
Во долгата видео-порака до рускиот народ емитувана рано на 24 февруари, откако силите на Кремљ почнаа да ја напаѓаат Украина, Путин се изјасни против проширувањето на НАТО кон исток и вети дека ќе ја „демилитаризира“ и „денацифизира“ Украина. Западните набљудувачи ја сметаат инвазијата како обид на Путин да ја смени безбедносната рамка на Европа во периодот по Студената војна.
Објавувајќи ја „специјалната воена операција“, Путин рече: „Нејзината цел е да ги заштити луѓето кои осум години се подложени на малтретирање и геноцид од режимот во Киев. И поради ова ќе се залагаме за демилитаризација и денацификација на Украина, како и изведување пред лицето на правдата на оние кои извршија бројни, крвави злосторства против цивилите, вклучително и граѓаните на Руската Федерација“.
Западните функционери, вклучително и шефот на НАТО, Јенс Столтенберг, предупредија дека алијансата очекува руски притисок во „наредните недели“ да се обиде да го заземе целиот источен регион на Украина Донбас и да создаде копнен мост до окупираниот Крим.