Путин им нареди на Русите: Семејствата треба да имаат најмалку две деца

Руските семејства мора да имаат најмалку две деца за да се обезбеди етничкиот опстанок на нацијата и три или повеќе за нацијата да се развива и просперира, рече претседателот Владимир Путин.

Русија претрпе тешки, но непознати загуби откако ја започна војната против Украина пред две години, а стотици илјади луѓе ја напуштија земјата поради противење на конфликтот или поради страв од мобилизација.

„Минимум две деца по семејство“
Путин им рече на вработените во фабриката за тенкови во регионот на Урал дека две деца по семејство е минималниот број доколку Русите сакаат да го задржат својот идентитет.

„Ако сакаме да преживееме како етничка група – поточно како етнички групи што ја населуваат Русија – мора да имате најмалку две деца“, рече тој.

„Ако секое семејство има само по едно дете, населението ќе се намали“, рече тој. „И ако сакаме да се шириме и развиваме, мора да има најмалку три деца“.

Бројот на Русите со години постепено се намалува
Путин се прогласи за поддржувач на „традиционалните вредности“ засновани на семејството, нацијата и верата на православната црква. За време на неговите 24 години на власт, земјата сериозно го ограничи изразувањето на сексуалната ориентација и родов идентитет и го забрани ЛГБТ движењето, означувајќи го како „екстремистичко“.

Русија две децении се соочува со постепен пад на населението.

Државниот завод за статистика процени дека имало 146,4 милиони Руси на почетокот на 2023 година, што е помалку од речиси 149 милиони 20 години порано, но повеќе од 143 милиони, бројот на Русите помеѓу 2007 и 2012 година.