Путин и Шолц разговарале за мировните преговори за Украина

По повеќе од шест недели радио тишина, германскиот канцелар Олаф Шолц повторно му се јави на рускиот претседател Владимир Путин. Кремљ соопшти дека разговорите се одвивале на германска иницијатива. Според Шолц, тој повикал на итен прекин на војната во Украина. „Мора да има прекин на огнот во Украина што е можно поскоро“, изјави канцеларот. „Тврдењето дека таму владеат нацистите е погрешно. И јас укажав на одговорноста на Русија за глобалната ситуација со храната“.

Шолц тоа утро веќе ја објави иницијативата во Комисијата за одбрана на Бундестагот. „Се разбира, во одреден момент мора повторно да има дипломатски иницијативи“, рече владиниот портпарол Штефен Хебестрајт, објаснувајќи го потегот на канцеларот. Целта е „да се најде излез од оваа страшна војна со страшен број на жртви, многу уништувања и исто така сета бесмисленост што војната ја носи со себе“.

По почетокот на војната во Украина, Шолц неколку пати му се јавил на Путин, последен пат на 30 март. Неколку дена подоцна стана познат масакрот во киевското предградие Буча, по што немало понатамошен контакт.

Кремљ за разговорите на рускиот претседател со Шолц соопшти дека Путин „детално информирал“ за целите на Русија во Украина. Еден фокус на разговорот беше на хуманитарните аспекти. Беше договорено дискусијата да продолжи „на различни канали“. Според руската новинска агенција Таса, Путин и рекол на канцеларката дека мировните преговори биле блокирани од раководството во Киев.