Прво испрати стотици илјади на фронтот, а Путин сега се жали дека снемува работници

Руската економија се соочува со недостиг на работна сила, изјави рускиот претседател Владимир Путин на состанокот со членовите на владата во вторникот.

Иако, според претседателот, оценките за состојбата на руската економија се „значително подобрени“, инфлацијата нагло се забави, а приходите од нафта и гас во буџетот наскоро ќе почнат да закрепнуваат, има недостиг на персонал во многу сектори.

„Наспроти позадината на сите тешкотии во изминатата година, домашните претпријатија избегнаа масовни отпуштања на вработени и ги задржаа своите тимови. Сега ситуацијата е суштински поинаква. Со оглед на историски минималната невработеност во целата земја од 3,5%, едноставно нема доволно работници во многу области“, се пожали претседателот.

За да се реши проблемот, според Путин, можно е да се искористи „кадровскиот потенцијал на регионите“, каде стапката на невработеност останува висока, како и да се воведат технологии за „посно производство“ со автоматизација на работните процеси.

По масовната мобилизација, која зафати 300.000 работоспособни мажи и предизвика бегство на речиси милион повеќе руски граѓани во странство, Министерството за економски развој забележа намалување на работната сила во Русија за 600.000 луѓе.

Недостигот од работници во индустријата, според Институтот Гајдар, ги достигна своите максимални вредности во целата историја на набљудувања (од 1993 година), а во некои индустрии достигна ниво на целосен кадровски колапс. Истражувањето на Националната асоцијација на инфраструктурни компании и Шерпа групацијата во декември покажа дека градежната индустрија има недостиг од 25 отсто работници. Во исто време, 90% од компаниите очекуваат влошување на состојбата.