Проштална средба на Пендаровски со францускиот амбасадор Тимоние


Претседателот Стево Пендаровски денеска на проштална средба го прими амбасадорот на Франција, Кристиан Тимоние. На средбата беа разменети мислења за севкупните билатерални односи меѓу двете држави, при што беше оценето дека се карактеризираат со пријателство и меѓусебна доверба.

Пендаровски, како што соопштува неговиот кабинет, изразил задоволство што за време на четиригодишниот мандат на амбасадорот Тимоние двете држави станаа сојузници во НАТО, и беше донесена одлука за почеток на пристапните преговори со Европската унија. Во тој контекст, претседателот Пендаровски го истакна значењето на поддршката што Франција ја дава на европската перспектива на Северна Македонија и на регионот, посочувајќи дека по усвојувањето на новата методологија за водење на преговори, на државите-кандидати им е овозможено интеграцијата во ЕУ да се одвива преку имплементација на темелни реформи.

Претседателот Пендаровски му се заблагодари на амбасадорот Тимоние за севкупниот негов дипломатски ангажман во нашата држава и му посака успех на личен и на професионален план.