Промоција на три книги на рок-критичарот Петар Пеца Поповиќ

Во организација на СПОНА – Српскиот културно информативен центар во Македонија денеска ќе бидат промовирани три ниги на музичкиот новинар и рок-критичар Петар Пеца Поповиќ – „Пролет во Топчидер“, „Траги во бескрајот“ и актуелната „Чуварот на ‘бувља пијаца’“ .

Како што информираат од СПОНА, со Пеца Поповиќ, кој е роден 1949 година и е некогашен уредник на влијателните списанија „Џубокс“ и „Рок“, пред македонските љубители на пишаниот збор, со акцент на ‘музички’, ќе биде и професорот Михајло Пантиќ, кој се потпишува како уредник на неговите книги, објавени под закрилата на Книжевната општина Вршац (КОВ), а модератор на настанот ќе биде новинарот Иван Беќковиќ.

Како музички гости, промоцијата ќе ја збогатат Елена Христова и Сибо, од познатиот музички состав „Баклава“.

Поповиќ, кој како музички новинар остави важен белег на регионалната сцена, како критичар и хроничар, во неколку наврати беше главен и одговорен уредник на влијателната дискографска куќа ПГП-РТС, за домашна и лиценцна програма, као и уредник на музичкото радио 101, и на прва независна ТВ куќа – „ОК канал“.

Во негова режија се случија и два најголеми музички карвани во Југославија, кога во Загреб и во Скопје ги донесе најголемите регионални музички ѕвезди. На негова идеја за голем бесплатен концерт во Белград, Горан Бреговиќ и „Бијело дугме“ на 28 август 1977 година го одржаа антологискиот „Концерт код Хајдучке чесме“, настан кој и денес се смета за „југословенски Вудсток“.

Активен и во осма деценија од животот, Пеца Поповиќ ги потпишува книгите: „Рокописи“ (2008), „Кикинда short 04 – две приказни“ (2010), „Да се биде рокенрол“ (2011, заедно со Михајло Пантиќ), „Пролет во Топчидер“ (2020), „Траги во бескрајот“ (2021) и „Чуварот на ‘бувља пијаца’“ (2022).