Промоција на „Трамонтана“, прв роман на Наташа Сарџоска, на Семот на книгата

Наташа Сарџоска, поетеса, преведувачка и антрополог, го објави својот прв роман „Трамонтана“ во Издавачкиот центар ТРИ. Дејството на романот се одвива во Париз и Скопје, но и Виена и Охрид, а главните ликови испреплетуваат повеќе карактерни специфики на културолошките и социјалните мрежи на кои припаѓаат.

 Станува збор за психолошки роман, во којшто двата главни лика Алма и Алба се длабински прикажани во нивната најсуштинска интимност,  сѐ до нивно сплотување, сѐ до нивно препознавање како двојнички. Сарџоска пишува женско писмо со силен поетски израз и естетски набој. Отуѓеност, осаменост, анонимност, промискуитет, празнина, слобода, неконформизам, но и трговија со луѓе и лицемерие на хуманитарните и меѓународните организации како и корупција на македонскиот систем се само од неколкуте теми што ги разработува Сарџоска во оваа повеќеслојна приказна. Таа зборува за потрагата по слободата преку неприпаѓањето, слобода која одамна му е одземена на човекот, слобода што е метафорично прикажана низ призма на каталонскиот свиреп и брутален ветер трамонтана, кој го обележува и настанокот на дејството, детството на главниот лик, и завршетокот на дејството, заминувањето на главниот лик кон непознатото. Трамонтана е морски ветер кој зад себе остава пустош и празнина и алузија дека овој роман ќе ве одведе целосно отаде празнината на востановените рамки и геометрии на постоење.

Првата промоција на овој роман е закажана за 10 септември на Саемот на книгата во 18 часот. Промотор ќе биде Милена Силјаноска. Авторката ќе биде отворена за разговор со читателите и новинарите како и за потпишување примероци од романот.