Продолжуваат блокадите во Чашка околу паралелката на албански јазик

ВЕЛЕС – Незадоволни што протестот пред училишната зграда кој е од 22 ноември лани не вради плод, односно оти не биле ислушани од надлежните институции, родителите на учениците од ОУ „Тодор Јанев“ од Чашка, кои се против формирање на паралелка на албански јазик во нивното училиште, тие веќе трет ден од 7 до 10 часот наутро мирно ги блокираат приодите кон општината, на две места пред галеријата на железничката пруга на влезот во Чашка и на мостот на Тополка во правец на селата Отиштино и Горно Оризари.

Тие втор ден од 7 до 10 часот мирно ја блокираат и работата на Општина Чашка. Воедно поради блокада на патиштата веќе трет ден во училиштето во Чашка не доаѓаат со комбиња ни децата од албанската паралелка во прво одделение и останатите ученици од албанска националност од погорните одделенија, кои се од селата во Општина Чашка, а кои и досега само седеа во училниците но немаа настава, вели Цвета Пешоска од Советот на родители.

Таа најави дека со мирна блокада ќе продолжат в понеделник.

Децата од македонска националност од ОУ „Тодор Јанев“ во Чашка не посетуваат  настава со започнување на протестите од 22 ноември лани, а не продолжија ниту во второто полугодие.

Пешовска нагласува дека не се против децата од албанска националност да учат во училиштето, но тоа да биде во заедничките паралелки со нивните деца на македонски наставен јазик како што беше досега.

Тие предлагаат посебна паралелка за албански јазик за првачињата да се воведе во друго подрачно училиште во селата во Општина Чашка каде жителите се со албанска националност, но не и во Чашка каде нема ниту еден регистриран жител од албанска националност.

Министерот за образование и наука Јетон Шаќири на нивните барања пред еден месец им одговори дека во училиштето се исполнети сите услови за формирање на паралелка на албански наставен јазик и најави дека ќе се заложи за смена на статутот на ОУ „Тодор Јанев“ во Чашка, а кое е на настава на македонски јазик. (МИА)