Претседателите на Уставниот суд, на Врховниот суд и на Судскиот совет во посета на Грција

 Претседателот на Уставниот суд Дарко Костадиновски, престојува во дводневна работна посета на Атина, со цел средби со претставници на највисоките судски институции во Република Грција.

Костадиновски е во придружба на претседателот на Судскиот совет, Александар Камбовски и претседателот на Врховниот суд, Африм Фидани. Според агендата, ќе остварат средби со претседателите и претставници на Врховниот суд , Државниот совет и Ревизорскиот суд на Република Грција, соопшти Уставниот суд.

Посетата е во насока на продолжување на дијалогот, унапредување на меѓуинституционалната соработка и размена на искуства и информации од областа на владеењето на правото, со крајна цел зајакнување на правната сигурност.

Посетата се реализира во периодот од 1-3 април на покана на Сотирос Георгијадис, судија во Апелациониот суд во Атина, и времено упатен во Специјалната правна служба при Министерството за правда на Република Грција.