Препорака од ЕУ: Не одете на Лефкада, Закинтос и 11 други грчки острови

Грчките острови во јужното Егејско Море се означени со темно црвена боја на картата на Европскиот центар за превенција и контрола на болести (ЕЦДЦ) Ковид-19 во четвртокот по зголемувањето на инфекциите, што значи дека не се препорачуваат патувања, освен оние што се неопходни.

Групата од 13 острови ги вклучува најпопуларните грчки дестинации за странски туристи – Миконос, Санторини и Родос – кои, заедно, привлекуваат милиони луѓе секое лето. Меѓу нив се и Лефкада и закинтос, каде редовно одат многу македонски туристи.

Грчкиот заменик министер за цивилна заштита, Никос Хардалиас, во четвртокот попладне рече дека Миконос и Иос се „на чекор“ каде властите ќе воведат ограничувања. Тој рече дека ситуацијата е загрижувачка и на островите Закинтос, Тинос, Лефкада, Санторини, Парос и Родос.

Грција, која е зависна од туризмот, се потпираше на промовирање на островите без корона вирус за да привлече посетители ова лето, со надеж дека заздравувањето на меѓународните патувања ќе го оживее секторот по 2020 година, најлошата година во последните децении.

И покрај успешниот јуни во однос на доаѓањето и оптимизмот на министрите и туристичките службеници, останува неизвесноста како ќе се одвива сезоната.