Преку заеднички понуди од регионот до повеќе азиски туристи

Македонските туристички потенцијали во наредните четири дена се презентираат на интернационалниот саем за туризам во Сингапур (ITBAsia) преку заедничка соработка со Србија и Црна Гора. Заедничкото претставување на туристичките потенцијали на трите држави како една дестинација е под слоганот „Вратата на Балканот”.

Од Агенцијата за промоција и поддршка на туризмот информираат дека на првиот ден од отворањето на оваа туристичка берза е регистриран неочекувано голем интерес на азиските туроператори за неоткриените балкански убавини.

-Потенцијалот на азискиот пазар е огромен и бројот на туристи од овој дел на светот кои ја посетуваат Европа и Балканот се во пораст секоја година. Балканот е неоткриена туристичка дестинација и е меѓу приоритетите на АППТ за следните неколку години. Преку учество на саемов целиме кон зголемување на бројот на туристи од Азија за 50 проценти, зајакнување на регионалната соработка, како и заедничко претставување на Балканот како една дестинација за трети пазари, изјави директорот на АППТ Љупчо Јаневски.

Ова, оценува, е совршена можност за будење на интересот кај македонските туроператори за организирање поголем број кружни тури на азиски туристи, кои пак би оствариле неколку ноќевања во овие три земји, а очекувањата за следниве неколку години е растот на туристичките посети да биде од 30 до 50 проценти.

Според АППТ, за време на најзначајниот саем за туризам во Сингапур се потврдени 50-тина средби со тур-оператори од овој дел на светот, а претставувањето на нашата држава е во соработка со Туркиш Ерлајнс и македонски туроператори пред кои е огромна можност за почнување соработка и проширување на понудата.

-Саемот за туризам ITB Asia е насочен кон бизнис заедницата и оваа година се организира 12-ти пат. На него ќе учествуваат 1.000 изложувачи, 1.000 купувачи и 11.000 посетители од 127 земји од кои 70 проценти се од Азија, 60 проценти се купувачи со препорака, додека 25.000 е бројот на состаноци кои се однапред договорени. Дополнително, според статистиката на саемот, еден од двајца купувачи потпишуваат договор за соработка и 70 проценти од учесниците имаат мандат за носење одлука (високи менаџерски позиции) што го прави овој саем еден од највлијателните во туристичката индустрија, информира Агенцијата за промоција и поддршка на туризмот.