Извонредниот Кинез Пан го собори светскиот рекорд на 100 метри слободно за дури 40 стотинки

Петтиот ден од натпреварите во пливање на Олимписките игри во Париз го донесе и првиот светски рекорд во базенот Ла Дефенс, а го постигна 19-годишниот Кинез Жанле Пан на 100 метри слободно, додека домашниот претставник, 22-годишниот Леон Маршанд, освои злато на 200 метри пеперутка и 200 метри градно.

Младиот Пан ја декласираше конкуренцијата во финалето, стартуваше како испукан од топ и на целта стигна со време од 46,40 секунди, дури 40 стотинки побрзо од претходниот светски рекорд што го постави пред пет месеци на Светското првенство во Доха.

Колку беше доминантен Пан покажува тоа што се одлепи од конкуренцијата за повеќе од секунда, среброто го освои Австралиецот Кајл Чалмерс (26) со 47,48 кој на последните две ОИ се закитуваше со златото во оваа дисциплина, додека Романецот Давид Поповичи (20) стигна до бронза, по освоеното злато на трката во двојно подолги патеки од пред 24 часа.

Маршанд ѕвезда на Игрите
Една од најголемите ѕвезди на Игрите во Париз е домашниот пливач Леон Маршанд, кој во средата постигна извонреден подвиг, освојувајќи злато на 200 метри пеперутка и 200 метри градно истата вечер, а до двете титули стигна со нови олимписки рекорди.

На самиот крај на 200 метри пеперутка го престигна светскиот рекордер, бранителот на титулата од Токио и светскиот шампион од Будимпешта пред две години, Унгарецот Кристоф Милак (24). На крајот, работ на базенот го допре Маршанд со време 1:51.21, а Милак со време 1:51.75. Бронзата ја освои младиот, 19-годишен Канаѓанец Иља Харун со 1:52,80.

Во дисциплината 200 метри градно, Маршанд доминираше од почеток до крај и го освои златото со време од 2:05.85, речиси една секунда пред бранителот на титулата од Токио, Австралијанецот Зак Стублти-Кук, кој го освои среброто со време од 2:06.79. . Холанѓанецот Каспар Корбо (23) ја освои бронзата со 2:07.90. Маршанд сега е со три злата во Париз, ја има титулата и на 400 метри мешано.