Пратениците на ВМРО-ДПМНЕ пред Џафери со транспаренти „Активна блокада за национален спас“

Собранието ја почна 71. седница, ВМРО-ДПМНЕ со транспаренти за најавената блокада
Скопје, 10 мај 2022 (МИА) – Во Собранието денеска со доцнење од речиси два часа почна 71. пленарна седница, со пратениците од опозицијата иако најавија блокада на работата на законодавниот дом.

Координаторот на пратеничката група на ВМРО-ДПМНЕ и коалицијата „За обнова на Македонија“ Мицевски процедурално рече дека денешната седницата била закажана за 11 часот и забалежа оти се доцни еден час и 40 минути или околу два часа.

-Вам не ви треба активна блокада, вие сами се блокирате, рече Мицевски обраќајќи се на пратениците од власта. Побара од претседателот на Собранието Талат Џафери, како што рече, да ги укори оние што не се присутни во салата, како и половина Влада, која не е тука.

-Вие сте блокадата на државата, вие сте тие кои го кочите работењето на овој парламентарен дом. Активната блокада што ја предлагаат пратениците од ВМРО-ДПМНЕ е за спас од национална катастрофа и затоа повикуваме на избори кои се излез од оваа криза која вие ја продуцирате, нагласи Мицевски. Додаде дека тоа го бара и народот или активна блокада за спас од национална катастрофа, за спас од понижувањето кое го правите, за спас од лицемерието што го покажувате секојдневно на граѓаните, за спас на екомнијата, на енергетиката, на земјоделците и на сите граѓани…

Мицевски повика сите да дојдат на време на пленарната седница и најави дека ќе бидат активно присутни.

По процедуралното обраќање на Мицевски, пратениците од ВМРО-ДПМНЕ застанаа пред претседателот на Собранието Талат Џафери со транспарент „Активна блокада за национален спас“, по што тој ги повика да седнат на своите места.

Џафери потсети на собранискиот Деловник и на обврските на пратениците за присуство, а во однос на транспарентот на пратениците на ВМРО-ДПМНЕ потсети на последниот Извештај од Европскиот Парламент, поточно Комисијата за надворешна политика на ЕП што го добиле пред некој ден. Џафери прочита извадоци од Извештајот и рече дека тој ќе им биде поделен на пратениците.

Активната блокада, според најавите на опозицијата, ќе трае се до постигнување договор за датум за предвремени парламентарни избори. Одлуката за блокада ја донесе Извршниот комитет на ВМРО-ДПМНЕ на 4 мај, а поздразбира „попречување на штетните закони и политики“. Активната блокада, велат, е барање на граѓаните, бидејќи, според нив, СДСМ создаде криза и сиромаштија.

Од опозицијата бараат лидерска средба, но премиерот Димитар Ковачевски го одби ваквото барање посочувајќи дека нема да се одржи средба заснована на закани и уцени. Доколку евентуално се одржи лидерска средба, според Ковачевски, тогаш на неа ќе се разговара за прашања кои се стратешки и кои значат подобар живот на граѓаните.

За парламентарното мнозинство, потегот на опозицијата да ја блокира работата на Собранието е за политички цели и со неа ќе им се наштети само на граѓаните и на компаниите. Од СДСМ денеска побараа да се откажат од сите привилегии, да ги донираат платите и да престанат да користат службени телефони и патувања и се што им следува.

На дневен ред на денешната седница се повеќе предлог-закони, главно од областа на финансиите и одбраната. Пред пратениците се и неколку предлог – одлуки, како и годишни извештаи за работата на државни агенции, комисии, МРТ и Судскиот совет. Ќе се разгледува и Годишниот извештај на Народниот правобранител за степенот на обезбедувањето почитување, унапредување и заштита на човековите слободи и права во 2021 година.