Познатиот Флавио Бријаторе го негираше вирусот, сега е во болница во комплицирана состојба

Во ноќниот клуб на Бријаторе на Сардинија има заразено повеќе од 60 вработени и гости

РИМ – Флавио Бријаторе, еден од најблескавите бизнисмени во Италија, кој ги напаѓаше ограничувањата за спречување на епидемијата со Ковид-19, беше хоспитализиран во вторникот, откако беше тестиран позитивно за оваа болест, се вели во соопштението на неговиот персонал.

Бријаторе (70) стана познат како менаџер на тимот во Формула 1 во 1990-тите и 2000-тите, а ги менторираше светските шампиони Мајкл Шумахер и Фернандо Алонсо.

Тој во неделата бил однесен во болницата „Сан Рафаеле“ во Милано, откако добил треска, се вели во соопштението на неговиот персонал. Во него се додава дека неговата состојба е „добра и стабилна“.

Бријаторе е сопственик на ноќниот клуб „Милијардер“ на медитеранскиот остров Сардинија и минатата недела жестоко го осуди локалниот градоначалник, кој воведе ограничувања на дискотеките, во обид да го искорени скокот во бројот на нови случаи на корона вирусот.

„Ми се крши срцето кога гледам економија заклана од луѓе што не направиле ништо“, рече Бријаторе на видеото објавено на Инстаграм.

Неговиот клуб сега се смета за жариште на корона вирусот со повеќе од 60 вработени и гости позитивни во последните денови.

Бријаторе последниве денови се сретна со бројни познати личности и играше фудбал со познати личности на 15 август. Еден од неговите соиграчи, менаџер на фудбалски клуб од Серија А, Синиша Михајловиќ, изминатиот викенд изјави дека го има вирусот.

Бријаторе се сретна и со поранешниот премиер Силвио Берлускони според објавата на Инстаграм. Берлускони во вторникот изјави дека поминал тест и немал ковид.

Пред летото, Сардинија беше еден од италијанските региони каде најмалку влијаеше епидемијата. Но, таа бележи нагло зголемување на случаите во август, бидејќи туристите од целата земја се спуштија на островот на одмор. (Ројтерс)