Пожар во Вардариште, цела Општина Аеродром без струја

Поради пожар на дивата депонија Вардариште каде што е зафатен поголем простор и постар објект исклучена е струјата за корисниците на Аеродром и Лисиче, соопштија од Центарот за управување со кризи (ЦУК).

-Во моментот интервенираат 13 пожарникари со пет противпожарни возила. Исклучени се далекуводите за Аеродром и Лисиче заради пожарот, се наведува во соопштението.

Од ЕВН, пак, велат дека станува збор за дефект на 110 киловолтна  трафостаница „Аеродром“.

„Моментално поголем дел од корисниците од Аеродром и Ново Лисиче, како и дел од корисниците од централното градско подрачје, се соочуваат со прекин во снабдувањето со електрична енергија. Екипите на Електродистрибуција веднаш се упатија на лице место со цел санација на дефектот“, велат од компанијата

Жители на Оптина Аеродром велат дека црниот густ чад се гледа од прозорците на нивните станови, но сепак, ветерот го носи на друга страна. Тие велат дека струјата била исклучена пред повеќе од еден час.