Пожар кај салата „Борис Трајковски“, силен ветар во Скопје со прекини на струја
Ветрот е толку силен што контејнерите се движат и се превртуваат по булеварите, од искрење на жици избувнаа пожари

Силно невреме попладнево го зафати главниот град, предизвикувајќи проблеми во сообраќајот и во снабдувањето со електрична енергија.
Пожар попладнево изби над Нерези и поради силниот ветер забрзано се шири кон Водно.
Пожар има и во близина на салата „Борис Трајковски“ каде гори ниска сува трева, а бројна полиција ги спречува возилата да се движат по пристапните улици. Ветрот е силен, па има можност да биде зафатена и салата. Цел Карпош мириса на чад.
Ветрот е толку силен што контејнерите се движат и се превртуваат по булеварите.
Во населбата Капиштец, на главната сообраќајница кај АМСМ, паднало дрво и целосно ја блокирало коловозната лента. Според информации од очевидци, полициски и комунални служби се на терен и работат на расчистување за нормализирање на сообраќајот.
Во близина на Бит пазар, невремето прави хаос, јавуваат очевидци.
Граѓаните на социјалните мрежи јавуваат и за повеќе пожари низ Скопје, предизвикани од искрење на електричните жици. Во исто време, половина од населбата Волково останала без струја, што дополнително ги зголемува проблемите на жителите.
Засега нема информации за повредени лица, но граѓаните апелираат на внимателност и да се избегнува движење покрај високи дрвја и електрични столбови додека трае невремето.
ЦУК: Vо повеќе делови од Скопје се предизвикани материјални штети и регистрирани пожари
По силното невреме проследено со интензивни ветрови, во повеќе делови од градот Скопје се предизвикани материјални штети и регистрирани пожари. Надлежните служби внимателно ја следат состојбата, додека Центарот за управување со кризи е во постојана координација со сите релевантни служби на терен, велат од ЦУК.
„Директорот на ЦУК, Мухамед Алу, заедно со дежурните служби при ЦУК, ги координираат активностите и ги информираат сите надлежни институции со цел навремено постапување.
Согласно досегашните информации, нема евидентирани повредени лица.
Ги повикуваме граѓаните кои имаат претрпено материјални штети или воочат дополнителни ризици, веднаш да се јават на бројот за итни повици 112“, информираат од ЦУК.
Од Управата за хидрометеоролошки работи информираат дека западниот дел од земјата е зафатен од нестабилно време со дожд, грмежи и засилен ветер, додека во централниот планински дел има појава на пороен дожд, грмежи, засилен ветер и суградица.(Б.Б.)