„Поршеа“ и „бентлија“ го полнат аеродромот во Хелсинки од каде руските туристи тргнуваат кон Европа

„Поршеа“, „бентлија“ и други луксузни автомобили со руски регистарски таблички ја полнат гаражата за паркирање на аеродромот во Хелсинки, бидејќи Финска станува важна транзитна земја за руските туристи кои летаат кон Европа.

ЕУ го затвори својот воздушен простор за руските авиони откако Москва ја нападна Украина, принудувајќи ги сите што сакаат да патуваат во Европа мора да возат преку границата или да одат по кружен пат користејќи незападни авиокомпании.

Откако руските ограничувања за Ковид-19 истекоа во јули, имаше бум на бројот на руски патници и зголемена реакција во Европа против дозволувањето на руските туристи да влезат додека трае војната.

Брзата прошетка низ паркингот на аеродромот во Хелсинки откри десетици, ако не и стотици автомобили од високата класа со руски таблички, вклучително и нов седан од класата С на „Мерцедес-Бенц“ и „порше 911 турбо С“.

„Тоа ме вчудоневидува“, рече финскиот патник, Јуси Хирвонен, откако ја напушти гаражата. „Посакувам да не беа тука пред да се реши ситуацијата во Украина“.

Финскиот министер за надворешни работи, Пека Хаависто, рече дека Финска станала „транзитна земја“ за руските туристи. „Аеродромот во Хелсинки во моментов е полн со руски туристи“, додаде тој.

Финска минатата недела соопшти дека ќе го ограничи бројот на руски туристички визи на 10 отсто од сегашните количини од 1 септември, по зголеменото незадоволство од рускиот туризам среде војната во Украина.

Русите продолжуваат да влегуваат во Финска со визи издадени од други земји на ЕУ во Шенген зоната за патување без граници за нивните патувања. „Тие доаѓаат овде со шенген визи издадени од различни земји, а потоа продолжуваат понатаму преку аеродромот во Хелсинки“, рече Хаависто.

Според истражувањето спроведено од финската гранична стража во август, околу две третини од Русите кои ја минуваат источната граница на Финска го прават тоа со шенген виза издадена од друга земја освен Финска.

„Унгарија, Италија, Австрија, Грција и Шпанија вообичаено им издаваат визи на Русите и генерално се меѓу првите земји што издаваат секоја година“, рече Мерт Шашиоглу, службеник на граничната полиција. Многу источни членки на ЕУ престанаа да издаваат туристички визи за Русите веднаш по инвазијата на 24 февруари, но на Русите со визи издадени од други земји на ЕУ им е дозволен влез во сите земји на ЕУ.

Министерот за надворешни работи на Литванија, Габриелиус Ландсбергис, во вторникот рече дека може да бара „регионално решение“ за забрана на руските туристи доколку земјите-членки на ЕУ не постигнат договор за санкција ширум блокот и се очекува следната недела да разговара со Летонија, Естонија, Финска и Полска на маргините на состанокот на министрите за надворешни работи на ЕУ во Прага.

„Ние бараме европско решение на прво место, бидејќи тоа е најодржливо и законски најправилно“, им рече Ландсбергис на новинарите во главниот град на Литванија, Вилнус.

„Доколку не постигнеме, не ја исклучуваме можноста да бараме регионално решение кое би ги вклучило балтичките земји, Полска и потенцијално Финска“, додаде тој, признавајќи сепак дека таквиот потег би бил „тежок“.

Хаависто рече дека правилата на Шенген не дозволуваат Финска да ја затвори границата за одредени националности, бидејќи за таквите санкции може заеднички да одлучува само ЕУ.

„Бидејќи Финска и балтичките земји планираат да ги ограничат овие визи, би било добро сите земји на ЕУ да донесат слични одлуки“, додаде тој.

Ова чувство го споделија многу Финци на аеродромот. „Треба да има одлука на ЕУ за затворање на границата“, рече патникот Јуси Хирвонен.

Нордиската земја има намера да го покрене ова прашање на следниот состанок на министрите за надворешни работи на ЕУ во Чешка на 30 август. (АФП)