Полициски час и пусти улици – Словенија со 1.323 новозаразени

Во вторникот во 21 часот, прв пат во историјата на независна Словенија, стапи на сила полициски час, кој трае од 21 до 6 часот наутро.

Ваквата драстична мерка, која оваа земја не ја примени во првиот бран на епидемијата, сега е оправдана со новите денешни 1.323 заболени од Ковид-19, во последните 24 часа.

Од полноќ дружењето е ограничено на најмногу шест луѓе, а постои и забрана за движење меѓу региони.

Воведувањето на полицискиот час во главниот град Љубљана е прилично мирно, а по 21 часот на улиците биле само полицајците.

Малку поинаку беше во Марибор, каде стотина граѓани демонстрираа на главниот плоштад, укажувајќи дека полицискиот час не е уставен.

Премиерот Јанез Јанша синоќа како реакција на протестот, на Твитер напиша дека Словенија во последните 24 часа имала повеќе од 1.100 новозаболени и ги повика луѓето да бидат сериозни.

Утрово портпаролот на Владата за корона вирус, Јелко Кацин ги повика луѓето да останат дома.

„Навистина, останете дома ако можете. Многу од нас мора да одат на работа, особено денеска. Пазете на себе и повикајте помош за оние на кои им е потребна. Не се малку“, напиша Кацин.

Во вторникот вечерта владата одлучи колективните спортови но само на највисоко ниво да продолжат да се одржуваат, додека кај поединечните дозволени се големи домашни и меѓународни спортски настани но без публика.

На фризерските салони им е дозволено да имаат еден клиент во дуќан од 20 метри квадратни.