Поддршка за туристичко-угостителскиот сектор и во четвртиот пакет мерки, најави Бектеши

Поддршката на туристичко-угостителскиот сектор ќе продолжи и во наредниот период преку Четвртиот пакет мерки кој е во фаза на подготовка, најави денес министерот за економија Крешник Бектеши на средба со претставници од Здружението за туризам и угостителство при Стопанската комора на Македонија.

„Мерките ќе се носат со целосна вклученост и консултација на секторот врз основа на реалните потреби“, истакна министерот Бектеши.

На средбата се разговараше за проблемите со кои се соочува секторот туризам и угостителство како резултат на здравствено-економската криза предизвикана од Ковид 19, и мерките кои во иднина ќе се превземат со цел намалување на штетите, соопшти Министерството за економија.

Важноста на овој сектор за Министерството за економија го покажува и фактот што еден од првите работни состаноци во новиот мандат е токму овој состанок со Здружението за туризам и угостителство, се вели во соопштението.

Министерот нагласи дека за поддршка на туризмот и угостителството се реализираа неколку мерки во изминатите неколку месеци како што се: субвенции за исплата на минимална плата на работниците, ваучери за поддршка на домашен туризам и субвенции за организирање на конференции, семинари и обуки во домашни туристички капацитети.

Информираше дека досега се искористени над 25 илјади ваучери за поддршка на домашен туризам, а најголем дел од средствата за финансиска поддршка за исплата на минимална плата се искористени токму од туристичко-угостителскиот сектор, што покажува дека во прв момент поддршката била во вистински правец. Во овој момент Министерството за економија и Владата имаат поголема предвидливост за наредниот период и врз таа основа ќе ги креира идните мерки.

Министерот, исто така, информираше дека во програмата на Владата за четиригодишниот мандат е предвидено намалување на ДДВ на ресторантски услуги, што е едно од долгогодишните барања на туристичките работници.

Од Здружението за туризам и угостителство доставија неколку барања кои Министерството за економија ќе ги разгледа во најбрз можен рок, со цел да се дејствува навремено.

Меѓу барањата од Здружението за туризам и угостителство да се продолжи поддршката за придонеси на вработени, и финансиска поддршка за минимална плата до март месец следната година, ослободување на ДДВ за услуги во угостителството во времетраење од една година, да се предвиди ослободување од ДДВ на туристичките услуги кои се извршуваат надвор од Европската унија, и да се поедностави процедурата за субвенции. Меѓу барањата кои што ги достави туристичкиот сектор се и формирање на Гарантен фонд во туризмот, финансиска поддршка за маркетинг активности за дојдовен туризам, зајакната промоција во земјите од регионот и од Европската унија…

На состанокот беше договорено да се организира заедничка Конференција помеѓу Министерството за економија и туристичкиот сектор за одбележување на Денот на туризмот 27 Септември на која главни теми на дискусија ќе бидат актуелната состојба предизвикана од кризата од која ќе произлегуваат предлог мерки за поддршка на секторот како и реформа на туризмот и угостителството во насока на зајакнување на извозната компонента на секторот.