Почна чистката во СДСМ. Заев ги распушта извршните одбори на партиските разграноци

Претседателот на СДСМ Зоран Заев ги почна кадровските промени со разрешување на претседателите на сите 78 општински организации на партијата, чие именување, според партискиот статут, е во негова надлежност. Со тоа се распуштаат сите извршни одбори на локално ниво.

Ова е резултатот од синоќешната координација на најтесното раководство на „Бихаќска“. Заев соопшти  денеска дека во јуни ќе има промени и во сите ешалони на власта и во јавниот сектор , за што следната недела ќе има нова средба со лидерот на ДУИ Али Ахмети. Тој ги охрабри сите досегашни претседатели на општинските организации кои биле успешни во изминатиот период повторно да се кандидираат за партиската функција .

– Синоќа донесов одлуки, а денеска е ред да ги споделам – ќе бидат изработени решенија од страна на администрацијата на СДСМ и во текот на денов ќе ги потпишам решенијата. Одлуката е – се разрешуваат сите претседатели на општински ограноци на СДСМ. Сакам да им се заблагодарам на сите за активноста, работата, служењето на граѓаните, како претставници на локално ниво на најголемата владејачка партија, на сите претседатели на оние општински организации каде се победи на изборите. Апелирам да бидат повторно кандидати, нека се кандидираат на следниот конкурс кој уште идната седмица ќе биде објавен во постапка, изјави Заев по работниот појадок со бизнисмените што се одржа во хотелот Хилтон.

Премиерот појасни дека како  што ќе ги носат одлуките така ќе ги објавуваат преку медиумите и ќе ги информираат граѓаните.

-Почетокот на јуни или првата половина на јуни ќе се случуваат промените во општествениот сектор, тоа се јавните претпријатија, министерствата, Владата и сите владини институции. Во политичкиот дел во мојата партија каде јас сум директно надлежен, а тоа е во изборот на претседатели на општински организации, одлуката веќе ја донесов и синоќа ја соопштив на координација на колегите од раководството заради тоа што тоа е мое право, конечната олдука е токму таа, рече Заев.

Тој информира дека разрешувањата се во вкупно 78 општински организации. Оганите и телата на СДСМ веднаш ќе донесат одлука за отпочнување постапка за избор на нови раководства.