Почна аплицирањето за студентски стипендии и средства за поврат на купен музички инструмент за академската 2020/2021 година

Министерството за образование и наука информира дека во тек е аплицирањето за стекнување на правото на студентска стипендија во академската 2020/2021 година.

Конкурсите  за студенти запишани на додипломски студии на јавните и приватните високообразовни установи и посебен конкурс за студенти Роми, се објавени на интернет страницата на МОН, а крајниот рок за поднесување на документите е 30 ноември 2020 година.

Потенцијалните кандидати, кои ги исполнуваат конкурсните услови, можат да одберат својата апликација заедно со сите потребни документи да ја достават или хартиено преку архивата на МОН, или пак, да аплицираат електронски преку интернет платформата www.konkursi.mon.gov.mk.

Кандидатите кои ќе аплицираат електронски, немаат обврска да ги достават документите хартиено и обратно – студентите кои поради каква било причина немаат можност или нема да одберат да аплицираат електронски, ги доставуваат документите само хартиено во МОН, а апликацијата ќе се смета за валидна и ќе биде предмет на разгледување од надлежните комисии.

-Во тек е и конкурсот за поврат на средства за купен музички инструмент за академската 2020/2021 година. Со конкурсот на 25 студенти, запишани на државните високообразовни установи каде се остваруваат студиски програми од областа на музиката, а кои ќе ги исполнат конкурсните услови, Министерството за образование и наука ќе им изврши поврат на дел од средствата за купен музички инструмент во висина од 75 отсто од исплатените средства, но не повеќе од 100.000 денари по инструмент, информираат од министерството.

Оттаму додаваат дека аплицирањето е идентично како и кај студентските стипендии (потенцијалните кандидати одбираат или електронска или хартиена достава на документите) и трае 60 дена од денот на објавата на конкурсот.

-Имајќи ја предвид актуелната епидемиолошка состојба во државата, во интерес на заштита на личното здравје, а со тоа и заштита на јавното здравје, Министерството за образование и наука упатува апел до студентите, доколку се во можност да го искористат електронскиот начин на поднесување на апликацијата, кој е безбеден, но и поедноставен во однос на доставата на документите во хартиена форма во просториите на МОН, велат од министерството.

Упатството за електронско аплицирање е објавено на следниот линк.

За какви било прашања поврзани со аплицирањето за остварување на правото на стипендија, односно финансиска поддршка за купување музички инструмент, Министерството за образование и наука им стои на располагање на учениците.

Контактите на вработените во Секторот за ученички и студентски стандард, како и на сите останати вработени во МОН се објавени на овој линк, а официјалната електронска адреса на министерството е [email protected].