Почина Мустафа Јашар, еден од доајените на Турскиот театар во Скопје

На 77- годишна возраст почина Мустафа Јашар, еден од доајените на Турскиот театар од Скопје.

Како што објави НУ Турски театар – Скопје, Јашар беше чинарот на нашиот театар, нашиот сакан и вреднуван колега.

– Изразуваме длабоко сочувство до семејство и неговите најблиски, објави Турскиот театар на Фејсбук.

Мустафа Јашар е роден на 19 август 1946 година во Куманово. Дипломирал на Филолошкиот факултет во Скопје, а од 1971 година работел како актер во НУ Турскиот театар – Скопје, каде одигна многубројни улоги. За ликот на Креонт од претставата „ Антигона“, Јашар беше награден за најдобра машка улога на Интернационалниот фестивалот на античка драма „ Стоби“ во 2003 година. Ја освои наградата за епизодна улога „ Димче Трајковски“, на МТФ „ Војдан Чернодрински“ во Прилеп , 2005 година. Истиот фестивал му додели награда за животно дело, 2014 година. А, беше и лауреат на наградата Јуџел во 2020 година.

Кариерата на Мустафа Јашар паралелно течеше на филм и на телевизија, каде од втората половина на 70- тите години на минатиот век до минатата година одигра педесетина улоги во тв серии, играни  и тв филмови. Меѓу нив се : „ Итар Пејо“, „ Време води“, „ Црвениот коњ“, „Јужна патека“, „ Среќна нова 49“, „ Балканот не е мртов“, „ Трето полувреме “ и др.

Мустафа Јашар ќе биде погребан утре во 13 часот на градските гробишта во Бутел.