Почина големиот композитор Енио Мориконе

Италија– Италијанскиот композитор и диригент, Енио Мориконе, почина на возраст од 91 година.

Како што пренесе Холивуд рипортер, Мориконе починал поради компликации по скршеницата на бутната коска, која ја скршил минатата недела откако паднал.

Тој е најпознат по музиката за филмови, а со својот квалитет се стекна со прекарот „Маестро“.

Во соработка со својот пријател од детството, режисерот Серџо Леоне, остави неизбришлива трага во шпагети вестерните, поставувајќи нови граници кога компонираше музика за филмовите.

Во моментот на смртта со него била неговата сопруга Марија, а зад себе остави деца и внуци. Ќе биде погребан во кругот на семејството.

Во повеќедецениската кариера Мориконе направи музика за филмовите „За шака долари“, „Беше еднаш во Америка“, „Малена“, „Недопирливи“ и многу други, а шест пати беше номиниран за Оскар.

Почесен Оскар доби во 2007 година, за значаен придонес во кинематографијата, а Оскар, како најстар добитник прими во 206 година, за музиката во филмот „The Hateful Eight” на Квентин Тарантино.

Мориконе е роден во Рим на 10 ноември 1928 година и свиреше неколку инструменти.