По стагнацијата на почетокот на годината, во вториот квартал мал раст во еврозоната

Економијата на еврозоната забележа благ раст во вториот квартал, по стагнацијата во првите три месеци од оваа година, додека стагнираше на ниво на Европската унија, покажа во средата извештајот на Евростат, што е во согласност со првата проценка објавена на крајот на јули.

Сезонски прилагодениот бруто-домашен производ (БДП) на 20-члената еврозона порасна за 0,3 отсто во вториот квартал во однос на претходните три месеци кога стагнираше, покажуваат најновите проценки на европската статистичка служба, кои ја потврдија првата проценка.

Економијата на цела ЕУ стагнираше во вториот квартал од годинава во однос на првите три месеци кога беше зголемена за 0,2 отсто, исто така во согласност со првата проценка.

На годишно ниво, активноста во вториот квартал е зголемена за 0,6 отсто во еврозоната, а за 0,5 отсто во ЕУ, како што покажа првата проценка. Во првите три месеци тој порасна во двете области за 1,1 отсто, согласно податоците објавени на крајот на јули.

За споредба, најголемата светска економија, онаа на САД, во вториот квартал пораснала за 0,6 отсто, се вели во извештајот на Евростат, во однос на претходните три месеци кога пораснала за 0,5 отсто. На годишно ниво порасна за 2,6 отсто, откако во првиот квартал забележа раст од 1,8 отсто во однос на истиот период лани.

Евростат немаше податоци за Хрватска, Грција, Луксембург и Малта.

Од земјите чии податоци располагаше Евростат, најголем раст на активноста на квартално ниво забележа Ирска од 3,3 отсто, а по неа е Литванија со раст од 2,8 отсто, согласно првата проценка.

Блиску е и Словенија со раст на БДП од 1,4 отсто.

Најсилен пад на активноста е забележан во Полска од 3,7 отсто, а по неа е Шведска со пад од 1,5 отсто.

Најголемата европска економија, онаа на Германија, стагнираше во вториот квартал, по благиот пад во претходните два квартали.

Португалија бележи и стагнација во економската активност во однос на првите три месеци од годинава.

Според податоците со кои располага Евростат, Ирска го предводи растот на активноста на годишно ниво, за 2,8 отсто, согласно првата проценка.

Следува Романија со раст од 2,7 отсто, потоа Португалија и Кипар со годишни стапки на раст од 2,3 отсто.

Шпанија и Бугарија пораснале за 1,8 отсто, а Словенија за 1,6 отсто.

На годишно ниво, активноста најсилно падна во Естонија, за три проценти. Следат Шведска и Унгарија, со пад на БДП за 2,4 и 2,3 отсто, соодветно.

Германската економија се намали за 0,1 отсто на годишно ниво во вториот квартал, забележувајќи пад втор квартал по ред, покажува извештајот на Евростат.

Бројот на вработени во еврозоната и ЕУ е зголемен за 0,2 отсто во вториот квартал во однос на претходните три месеци, кога е зголемен за 0,5 отсто во двете области, покажуваат сезонски приспособените податоци.

На годишна основа, според сезонски неприлагодени податоци, тој е зголемен за 1,5 отсто во еврозоната и за 1,3 отсто во ЕУ, по 1,6 отсто раст во двете области во првиот квартал споредено со истиот период лани, покажува извештајот на Евростат.