Апел од Филипче до медиумите по шпекулативните бројки за новозаболени


Фото: Б. Грданоски

Откако деновиве, додека се живее во услови на пандемија, некои медиуми излегуваа со шпекулативни бројки за новозаболени од Ковид-19 во последните 24 часа, пред да излезат официјалните податоци од надлежните, министерот за здравство Венко Филипче, денеска испрати апел да престане таа пракса.

Неговиот апел ви го пренесуваме во целост:

„Почитувани медиуми и новинари,

Деновиве голем број на медиуми уште рано наутро објавуваат неофицијални и речиси секогаш неточни информации за бројот на новозаболени.

Од самиот почеток на оваа криза, лично јас и целиот мој тим за односи со јавноста сме ваш партнер. Веќе 100 дена навремено, прецизно и транспарентно ја известуваме јавноста. Ги соопштуваме сите детали за новозаболените од Ковид-19, сѐ со цел медиумите да имаат точна информација.

Уште еднаш ги замолувам медиумите да престанат да изнесуваат шпекулативни и непроверени информации околу бројот на заболени лица од Ковид-19. Ги молам да ја зачуваат својата улога и задача која ја имаат кон јавноста за навремено, точно и проверено известување.

Непримерно е во ситуација кога имаме секојдневно заболени и секојдневно известуваме и за секоја најмала промена, да се шпекулира со податоци токму од страна на оние кои треба да обезбедат прецизна информација за јавноста.

Со тоа се внесува конфузија кај населението и недоверба во институциите, а искрено верувам дека ова не е целта. Објавувањето број на новозаразени со Ковид-19 од страна на медиумите не смее да биде трка на ексклузивитет, затоа што станува збор за чувствителни информации за здравјето и животот на граѓаните.

Објавувањето на вакви непроверени информации е уште повеќе несфатливо затоа што Министерството за здравство редовно ги објавува сите информации, а доколку има промени и по неколку пати во денот. Сите прашања на новинарите се одговараат постојано и на дневно ниво.

Искрено се надевам дека оваа пракса ќе престане, а ние ќе продолжиме со навременото и точно информирање“.

И покрај овој апел од министерот и за денеска има шпекулативна бројка од 79 новозаразени и двајца починати, а Министерството за здравство сѐ уште не ги објавило конечните податоци за последните 24 часа.