По националната, распишана и меѓународна потерница за Мијалков

Кривичниот совет при Основниот кривичен суд Скопје донесе решение за  за распишување меѓународна потерница од страна на МВР за Сашо Мијалков.

 

-Заради интерес на медиумите во однос меѓународната потерница за обвинетиот С.М., ја информираме јавноста дека од страна на надлежното Министерство за внатрешни работи до Кривичниот совет при Основниот кривичен суд Скопје, предпладнево е поднесено барање за согласност од судот за распишување меѓународна потерница за обвинетиот на кој во текот на вчерашниот ден му беше определена мерка куќен притвор со 24 часовен надзор по негово пронаоѓање односно лишување од слобода, се наведува во соопштението од судот.

 

Кривичниот совет веднаш по приемот на барањето, како што стои во соопштението, има донесено решение за согласност за распишување меѓународна потерница од страна на МВР и истото е доставено до барателот.

Поранешниот шеф на УБК, Сашо Мијалков, од вчера попладне е недостапен, и полицијата не успеала да му го врачи решението за куќен притвор, што како мерка на претпазливост, на барање на обвинителството викендот го донесол Кривичниот суд. Иако не го нашле дома, според некои медиуми во домот бил неговиот телефонски апарат, чиј сигнал бил следен. Тој бил следен на јавен простор, како што било законски допуштено, но воедно бил следен и сигналот на неговиот телефонски апарат, кој водел од хотелот „Мериот“ до домот на Мијалков на Водно.Врз основа на телефонскиот сигнал се верувало дека Мијалков е дома, но на крајот се испоставило дека возилото со кое патувал телефонот не било управувано од Мијалков, туку од  друго лице или лица, чиј идентитетот првично не можел да се утврди поради блиндираните прозорци.

Министерството за внатрешни работи соопшти дека распиша национална, а побара согласност и за меѓународна потерница за Мијалков.

-Судот му одреди мерка куќен притвор на Сашо Мијалков. Преземаме мерки и активности за негово пронаоѓање. Распишана е национална потерница. Бидејќи од досега преземените мерки и активности лицето не е пронајдено, ќе го известиме судот и ќе побараме да биде издадена наредба за распишување на меѓународна потерница, информираа од МВР.

Во текот на вчерашниот ден Јавното обвинителство доставило писмено известување до Министерството за внатрешни работи дека Мијалков планира бегство поради високата затворска казна што ја очекувал во предметот за масовното прислушување „Таргет-Тврдина“, по што биле преземени техничко-оперативни мерки.