По гламур, пожар: Холивудските ѕвезди останаа без своите домови во Лос Анџелес

Два дена по 82. Златен глобус кој ги собра холивудските ѕвезди, сега шумски пожар беснее низ богат дел на Лос Анџелес, уништувајќи домови и предизвикувајќи сообраќаен метеж, додека 30.000 луѓе се евакуирани под огромните облаци чад што прекри голем дел од градот. Пожарот го опустоши луксузниот кварт на Лос Анџелес, дом на многу познати личности како Бен Афлек, Џене Аико, Том Хенкс, Мајлс Телер и други, пренесува Daily Mail.

Бен Афлек

Холивудската ѕвезда Бен Афлек минатиот јули купи луксузна палата во Пацифик Палисадес. Вилата е вредна 20,5 милиони долари. Има пет спални соби и шест бањи. За имотот од околу 570 квадратни метри, кој првично беше дизајниран од архитектот Клиф Меј во 1940-тите, Афлек подигнал заем од 10 милиони долари. Во меѓувреме, вилата е темелно реновирана.

Фотографите го фатија 52-годишниот актер како шокирано го гледа огнениот елемент. Тој се враќал во својот дом во моментот кога полицајците го блокирале преминот.

Мајлс Телер и Кели Спери

Актерот Мајлс Телер и неговата сопруга, манекенката Кели Спери, купија луксузна палата во март 2023 година за 7,5 милиони долари. Имотот од околу 600 метри квадратни содржи пет спални соби, седум бањи и бројни други пространи соби.

Том Хенкс и Рита Вилсон

Актерската двојка Том Хенкс и Рита Вилсон поседуваат луксузна палата во Пацифик Палисадес, проценета на 26 милиони долари. Куќата, изградена во 1996 година, се наоѓа на земјиште од 1,5 хектари, а Хенкс и Вилсон станаа нејзини сопственици во 2010 година.

Џејмс Вудс

Актерот номиниран за Оскар Џејмс Вудс (77) сподели видео од пожарот кој зафати куќа недалеку од неговиот дом, а подоцна објави дека е евакуиран од областа.

„Не знам дали нашиот дом сè уште постои, но за жал куќата во нашата мала улица ја нема“, напиша тој на X, додавајќи дека неговото семејство ја реновирало куќата по пандемијата и дека ја завршиле работата минатиот месец. „Се надевам дека сите ќе излезат безбедно… Заминуваме“, додаде тој.