Пирс Броснан се сели од имотот во Малибу инспириран од Тајланд и вреден 100 милиони долари
Пирс Броснан (73) и неговата сопруга Кили Шеј Смит (62) трајно се селат по 26 години. На 11 септември, парот објави дека ќе го напушти својот дом на брегот во Малибу, Калифорнија, вреден 100 милиони долари, поради долготрајна загриженост за безбедноста.
Свесни за потенцијалните шумски пожари и земјотреси, парот одлучил да се отсели од Калифорнија, пишува „Дејли мејл“ (The Daily Mail). „Неколку пати нè одминаа пожарите. Но, мислам дека е време за селидба. Сè се менува, сè се распаѓа“, изјави актерот познат по улогата на Џејмс Бонд, зборувајќи за вилата која претрпе штета од еден милион долари по пожар во гаражата во 2015 година, според „Лос Анџелес тајмс“ (The Los Angeles Times). „Живееме покрај оваа водена површина, на расед во зона на земјотреси. Тоа создава страв“, додаде тој.
Според епизода од 2020 година на видео-серијалот „On the Market“ на списанието „Architectural Digest“, луксузниот дом, наречен „Куќата на орхидеите“ (The Orchid House), бил инспириран од патувањата на парот во Тајланд додека актерот го снимал филмот „Утре не умира никогаш“ (Tomorrow Never Dies) во 1997 година. Откако го купиле земјиштето за својот дом во 2000 година, Броснан и Смит чекале една деценија куќата да биде изградена, а официјално се вселиле околу 2010 година.
Главната куќа, со површина од околу 1.160 квадратни метри (12.500 квадратни стапки), се наоѓа на само неколку чекори од брегот и е опкружена со високи палми. Одблизу, куќата се одликува со луксузни дрвени детали, вклучувајќи таван со вкрстени носечки греди во главната спална соба и сложени украси на влезната врата. Во внатрешноста, вилата располага со луксузна кино-сала со 20 седишта, ателје за сликање за Броснан, домашна теретана и студио за снимање. Самиот имот исто така вклучува спа-центар и надворешен базен со солена вода.
Иако Броснан за „Дејли мејл“ изјави дека ја сака близината до океанот, тој призна дека локацијата може да делува изолирано и дека одржувањето на имотот е скапо. Според весникот, тој и претходно неколку пати ја ставал вилата на продажба, а последен пат ја повлекол од пазарот во 2021 година.