Петти руски генерал уапсен за корупција

Руската тајна служба ФСБ објави дека поранешниот заменик-министер за одбрана на Руската Федерација, армискиот генерал Дмитриј Булгаков е приведен во случај на корупција, пренесува Интерфакс. Булгаков (69) е сместен во притворен центар.

ФСБ, како и Истражниот комитет, изјавија дека против Булгаков се истражува кривично дело од „корупциска природа“. Деталите за случајот не се откриваат. „Со пријавениот се вршат потребните истражни дејствија“, известија од Истражниот комитет.

ФСБ не го прецизираше процедуралниот статус на Булгаков или други детали, истакнувајќи дека „се спроведуваат истражни дејствија и оперативни мерки за да се утврдат причините и условите што придонеле за незаконската активност“.

По оставката на рускиот министер за одбрана Сергеј Шојгу во мај 2024 година, неколку високи воени функционери беа приведени во Русија. Приведени се четворица генерали: поранешниот заменик-министер за одбрана Тимур Иванов, началникот на главната управа за персонал на Министерството за одбрана Јуриј Кузњецов, началникот на главната управа за комуникации на Министерството за одбрана Вадим Шамарин и поранешниот командант на 58-та армија Иван Попов.  Булгаков е петтиот уапсен генерал.