Пендаровски ја промовираше визијата „МКД2030“
Според претседателот, „МКД2030“ ги утврдува политиките кои треба да се постигнат до следната деценија и областите во кои треба да се фокусира државата
Претседателот Стево Пендаровски денеска ја најави Рамката за развој „МКД2030“, која треба да биде стратешки документ и се изготвува на негова иницијатива.
Според него, „МКД2030“ ги утврдува политиките кои треба да се постигнат до следната деценија и областите во кои треба да се фокусира државата со цел напредок и подобар живот на граѓаните.
Ова е автентичен документ изработен преку консултативен процес со бизнис секторот, граѓанските организации, академска заедница и истакнати професионалци од повеќе области, рече Пендаровски. Преку приоритетите коишто ќе произлезат од „МКД2030“ ќе се калибрира Националната развојна стратегија 2021-2041.
„Верувам дека реалната состојба ни е позната на сите – иселувањето на младите продолжува, пасивност на електоратот, ниска доверба во институциите, длабока поделба во општеството по повеќе основи и зголемена нееднаквост во примањата“, рече претседателот во обраќањето.
Од овие причини, истакна претседателот, потребно е преосмислување на постулатите на нашиот економски и социјален развој и споделена визија за разојот на државата, поткрепена со национален консензус и координирани политики согласно реалните потреби и очекувања на граѓаните.
Според него, „МКД2030“ се фокусира на дигитализација, децентрализација и демократизација, преку еколошки, економски, аграрни и здравствени политики, па се до образование и наука и борба против иселувањето на младите од земјава. Со документот ќе бидат опфатени и приоритети кои не се засебни, а се однесуваат на повеќе сектори, како што се изградба на ефикасна јавна администрација, создавање еднакви можности и борба против корупцијата.
Стрaтегијата треба да биде финализирана во средината на 2022 година.