Пауновски: Лабораторијата никогаш не нѝ беше дадена и не е употребувана од нас бидејќи министерот за економија не дозволи

Откако министерот за економија Крешник Бектеши го обвини поранешниот директор на Пазарниот инспекторат дека имал мобилна лабораторија, но ја искористил само еднаш за проверка на квалитет, Стојко Пауновски вели дека таа не им била дадена никогаш.

– Ги негирам изнесените невистини од страна на министерот за економија Крешник Бектеши дека иако сме имале акредитирана лабораторија, истата не сме ја користеле.

Вистината е дека таква лабораторија беше набавена во 2019 година од страна на Владата, а јас, премиерот Зоран Заев и министерот Крешник Бектеши истата ја промовиравме заедно во јавноста како проект кој ќе ни помогне да вршиме квалитетна и независна контрола на нафтените деривати. Тоа требаше да биде револуција бидејќи дотогаш (и се уште), нафтената индустрија во земјава, иако претставува еден од најголемите загадувачи на животната средина, повеќе од една деценија е оставена сама да си го контролира квалитетот на горивата.

Лаборатијата никогаш не ни беше дадена и истата не е употребувана од наша страна, бидејќи министерот за економија не дозволи таа да оди под владение на Пазарниот инспекторат. За тоа две години се води и спор помеѓу Инспекторатот и Бирото за метеорологија, на кого и беше доделена лабораторијата – реагира Пауновски.