Папата им се извини на Ромите поради дискриминацијата
Папата Франциск денеска им се извини на Ромите поради дискриминациите во историјата на кои била подложена оваа заедница во Европа, и им оддаде почит на католиците во Романија, кои биле прогонети за време на владеењето на комунистите.
– Историјата не учи дека на христијаните, вклучувајќи ги и католиците, не им е непознато правење такво зло. Би сакал да побарам прошка од вас поради тоа, рече папата на последниот ден од тридневната посета на Романија.
Папата им се извини на Ромите поради „многубројните искуства“ што ги имале кога станува збор за дискриминација, сегрегација и малтретирање.
На крајот од посетата на папата на Романија, на аеродромот во Сибиу е одржана церемонија по повод неговото заминување, на која присуствуваше и романскиот претседател Клаус Јоханис.
Папата Франциск потоа замина за Ватикан.