Паѓаат индексите на берзите во Азија поради протестите во Кина

На азиските пазари, цените на акциите нагло паднаа во понеделникот, додека доларот зајакна бидејќи инвеститорите избегнаа поризични инвестиции поради протестите во Кина против острите рестриктивни мерки за борба против Ковид-19. Индексот MSCI на азиско-пацифичките акции, без јапонските акции, беше во минус за речиси 2 отсто околу 7:00 часот.
Истовремено, на токиската берза индексот Никеи ослабе за 0,6 отсто, додека цените на акциите во Австралија, Јужна Кореја, Шангај и Хонг Конг паднаа меѓу 0,4 и 2,4 отсто.

Берзите се под притисок поради протестите против строгите мерки за спречување на ширењето на вирусот, што избувнаа во неделата наутро во неколку кинески градови, вклучувајќи го и финансискиот центар Шангај, како и делови од главниот град Пекинг, пренесува СЕЕбиз.

Нов бран на незадоволство предизвика пожарот што во четвртокот избувна во зграда во главниот град Урумчи во регионот Ксинџијанг, при што загинаа десет лица. Гневот на јавноста беше предизвикан од сомнежите дека станарите на зградата не можеле да побегнат навреме бидејќи зградата е делумно затворена.

„Пазарот не сака неизвесност и јасно е дека протестите во Кина ги загрижија инвеститорите и затоа тие не се склони кон поризични инвестиции. Некои се плашат и од нови протести, со оглед на острите рестриктивни мерки, кои би можеле да доведат до слабеење на економијата“, вели Роберт Субараман, главен економист во Номура.

Вестите за натамошното зголемување на бројот на заразени со вирусот ковид-19 во Кина, исто така, имаат негативен ефект врз пазарите, што може да доведе до нови рестриктивни мерки, кои би го забавиле и онака многу бавниот раст на втората по големина економија во светот.

Затоа инвеститорите не беа охрабрени ниту од одлуката на кинеската централна банка да ја намали стапката на распределба на задолжителните резерви на банките за 0,25 процентни поени, што треба да го поттикне кредитирањето, а со тоа и растот на економијата.