Падна спорниот ДУП за Козле во Скопје

Советниците на Општина Карпош не го изгласа спорниот ДУП за Козле. Против гласаа сите присутни 17 советници, од советничките групи на СДСМ, ВМРО-ДПМНЕ, Левица и независните советнички, додека советниците од ГРОМ уште пред гласањето ја напуштија седницата.

Со ова се поддржани барањата на жителите кои денеска револтирани дојдоа на седницата и беа против овој план, кој дури трипати беше на јавна анкета пред граѓаните.

Градоначалникот Стевчо Јакимовски претходно ги повлече сите 28 точки од дневниот ред кои тој ги предложил, а советниците повторно ги предложија и ги вратија на дневен ред. На седницата немаше присутни од  општинската служба за поддршка, ниту камера, туку само со тонско снимање, советниците очекуваат нови манипулации.

„Очекуваме нови манипулации – да не ја потпише градоначалникот одлуката на Советот, да не се објави во ‘Службениот гласник’ и слично, но ние сме тука сите, да ги поддржиме граѓаните, затоа што општината не е само на еден човек туку на сите граѓани“, вели советничката од ВМРО-ДПМНЕ Адријана Јакимовска-Панчевска.

Утрово, Јакимовски во живо се обрати до јавноста околу тврдењата дека со новиот ДУП на таа локација е предвидено да се градат пет нови згради.