Пациентите со рак протестираа пред МЗ на 40 степени – терапија е обезбедена

Пациентите на онкологија денеска одржаа протест пред Министерството за здравство, барајќи решенија за континуираниот недостиг на терапија на Клиниката за онкологија, а беа примени од заменик-министерот за здравство Јовица Андоновски.

Во моментот проблемот со терапијата во Клиниката за онкологија е надминат, информираа од  „Пеперутки“, затоа што дел од терапијата веќе е пристигнат, а остатокот се очекува во наредните денови. Најчесто недостасувале терапии како „Фулвестрант“ и „Золадекс“, а овојпат имало недостиг и на дел од цитостатиците што се на позитивната листа.

Од групата велат дека ваквите застои создаваат страв, револт и неизвесност кај пациентите. Тие нагласија дека не бараат привилегии, туку навремена и континуирана терапија. Доколку проблемите со снабдувањето повторно се повторат, најавија дека ќе бараат јасно да се утврди каде настанува проблемот – во институциите или кај дистрибутерите – и ќе се обратат директно до сите засегнати страни.

Како еден од главните проблеми, „Пеперутки“ ја посочија недоволната превенција и слабите скрининг-програми. Според нив, без рано откривање на болеста бројот на пациенти ќе продолжи да расте, а со тоа ќе растат и трошоците за лекување. Затоа, наместо краткорочни и ад-хок решенија, потребна е долгорочна национална стратегија за борба против ракот.