Овој шпански град има најмногу зелени површини во Европа
Никој од жителите на Виторија, град на северот на Шпанија, не е на повеќе од неколку минути пешачење од зелените површини. Во овој град има дури 50 квадратни метри зелена површина по жител, наспроти 31 во Лондон и 17 во Барселона, објави Гардијан.
Овој град во Баскија беше прогласен за зелен главен град на Европа од страна на Европската комисија во 2012 година, а го нарекуваат и „anillo verde“ (зелен прстен), пред се поради серијата од 30 километри од паркови и велосипедски патеки што го опкружуваат тоа, пренесува гореспоменатиот весник.
Британските медиуми наведуваат дека луѓето кои ја воделе Виторија во седумдесеттите години на минатиот век, кога многу други европски градови граделе се повеќе патишта, уште тогаш донеле прилично радикална одлука да го промовираат пешачењето во центарот на градот, спротивно на сегашниот тренд.
Тие ја создадоа и првата мрежа на велосипедски патеки во Шпанија, која сега се протега на 180 километри и е една од најобемните во земјата. Плановите за создавање на гореспоменатиот зелен прстен првпат беа разгледани во осумдесеттите, а работата започна во раните деведесетти, која вклучуваше проект за засадување 250.000 дрвја.
„Ние сме град во кој луѓето сакаат возење велосипед и пешачење по ридовите, а голем дел од поттикот Виторија да стане зелен град доаѓа од нејзините граѓани“, вели шефот на градскиот оддел за животна средина, Родригез Рамахо.
„Гардијан“ забележува дека многу делови од градот биле постепено затворени за сообраќај, што го зголемило уделот на пешачките зони на тоа место од 31 на 71 отсто. Родригез, исто така, истакнува дека некои од овие мерки наишле на неизбежен отпор.
„Отсекогаш баравме вклучување на еколошки здруженија и здруженија на жители во овие иницијативи, и мислам дека луѓето овде се горди на нашиот зелен дух“, вели тој.
Гардијан забележува дека многу жители се навистина горди на тоа, но некои од нив тврдат и дека консултативниот процес изгледа подобро на хартија отколку во пракса. Меѓу другото, тие го посочуваат стравот дека со позеленувањето доаѓа и гентрификацијата, која во областите каде живее работничката класа може да доведе до раселување на првобитните жители, бидејќи цените на недвижностите растат.
Виторија се протега на површина од близу 280 км2, ѐ во неа живеат околу 250.000 жители.