Откажана е првомајската парада во Москва, имало закана од тероризам

Првомајската парада во Москва нема да се одржи поради зголемената закана од тероризам, најави најголемата синдикална федерација во Русија, додека руските власти постојано предупредуваат на оваа закана во контекст на конфликтот во Украина.

„Во главниот град нема да има паради или собири, планирана е само свечена седница“, изјави потпретседателот на Руската федерација на независни синдикати Александар Черчуков, пренесува руската прорежимска новинска агенција ТАСС.

„Одлуката беше донесена од властите бидејќи нивото на терористичка закана е зголемено, дури и во областите далеку од местото на специјалната воена операција“, рече тој, користејќи го еуфемизмот на Кремљ за инвазијата на Украина.

Одбележувањето на Меѓународниот ден на трудот, многу празнично низ цела Русија, редовно го организираат синдикатите лојални на руската влада. Во Москва и нејзините предградија вообичаено се одржуваат големи културни настани и политички собири по повод овој празник, кој е неработен ден низ целата земја.  (СЕЕбиз)